«Реал» жамоаси бош мураббийи Зайнидин Зидан Испания Примерасининг 35-турида «Валенсия»га қарши кечган ва 2:1 ҳисобидаги ғалаба билан якунланган ўйиндан кейин фикрларини билдириб ўтди.
Ўйин ҳақида
«Валенсия» ўз ўйинини топиб олган, голдан кейин уларнинг ўзига бўлган ишончи ортди. Биз иккинчи голни уриш учун қаттиқ ҳаракат қилдик, аммо бу ҳадеганда рўй беравермади. Менимча, биз мавсум якунига қадар ўйинларда бурнимиз билан ер қазишимизга тўғри келади.
Бу ўйинда имкониятлардан фойдалана олмаслик муаммоси кўп кўзга ташланди. Эҳтимол, «Реал» кўп ҳаяжонланганди, аммо, айтишим керакки, биз рақибга ўз режаси бўйича ўйнашга қўймадик.
Агар ўз имкониятларингдан фойдалана олмасанг, 3 очко учун кураш олиб боришингга тўғри келади. Биз «Депортиво» билан ўйинда ҳам шундай вазиятга тушгандик. Ҳа, «Валенсия» билан ўйинда биз интригани ўлдиришимиз ҳам мумкин бўлганди, аммо бу ўйиннинг бир жиҳати, камчиликлар устида ишлаш керак бўлади. Қайд этишни истардимки, меҳмонларнинг голидан кейин биз ўзимизга ишончни сақлаб қолдик ва якунда «Реал» муҳим ғалабага эришди», – деган Зидан.
Хамеснинг ўйини ҳақида
«У ўйинни ёмон ўтказмади, у менинг топшириқларимни бажарди. Унинг ва «Реал»нинг барча футболчилари ўйинидан қониқиш ҳосил қилдим. Яна бир бор қайтараман, агар рақиб ҳисобни тенглаштирса, сенга жуда қийин бўлиб кетади, айниқса яна гол уриш учун вақт кам қолган бўлса. Ўйлайманки, «Реал» мухлислар кўмаги туфайли ҳам «Валенсия» дарвозасига иккинчи голни урди, улар бизни олдинга чорлаб туришди. Ҳолбуки, рақибнинг йўқотадиган нарсаси йўқ эди. Биз босим остида қолгандик», – деган «бланкос»нинг бош мураббийи.
Марсело ва Карвахалнинг ўйинлари ҳақида
«Менинг жамоамда дунёнинг энг яхши ҳимоячилари тўп суришади. «Валенсия»га қарши ўйинда улар катта ҳажмдаги ишни бажаришди. Ростини айтсам, аввалги ўйинларда бундай ҳолатни кўрмагандим. Бу жамоа учун жуда яхши. Албатта, Марсело ва Дани «Реал»нинг муҳим ўйинчилари саналишади», – дея маълум қилган «қаймоқранглилар» жамоаси устози.
Исконинг ҳолати ҳақида
«У «Атлетико»га Чемпионлар Лигаси доирасида кечадиган ўйинда тушиш-тушмаслигини кейинроқ билиб оласиз. Бу футболчи аъло даражадаги спорт формасида эканини ҳамма кўриб турибди. У «Депортиво»га қарши кучли ўйин кўрсатди. Ҳар қандай ҳолатда ҳам жамоани ўйлаш керак, бу масала «Атлетико»га қарши ўйин куни аниқ бўлади.
Вараннинг қайтиши хусусида
«Рафаэлга келсак, у Мадрид дербисида ўйнаши мумкин. У «Депортиво»га қарши ўйинда сафга қайтганди, аммо эҳтиёт бўлиш керак. Йўқ, у билан барчаси жойида, лекин биз таваккал қилишни истамаймиз. У мавсумда икки марта жароҳат олди. Мен бу яна бир бор такрорланишини истамайман», деган «Реал» устози.
