«Реал»да хаос. Валверде ва Чуамени муштлашиб кетди

«Реал»да ички муҳит кундан кунга ёмонлашмоқда. «Барселона» билан ўйинга бир неча кун қолганида мадридликлар можаро гирдобида қолди – иш шу даражага бориб етдики, футболчилар ўзаро жанжаллашмоқда.

Чуамени ва Валверденинг жанжали

Сўнгги кунларда футбол оламидаги асосий янгилик – Орелиен Чуамени ва Федерико Валверде ўртасидаги муштлашув бўлди. Marca маълумотига кўра, ушбу яримҳимоячилар дастлаб чоршанба кунги машғулот чоғида низолашиб қолган, аммо ўшанда иш очиқ муштлашувгача бориб етмаган.

Пайшанба куни футболчилар ҳиссиётларини жиловлай олишмаган. Хабар қилинишича, франциялик футболчи можарога чек қўйиш учун Федедан узр сўраган, аммо уругвайлик унинг узрини қабул қилмаган. Машғулот вақтида эса жамоадошига қарши қўпол ўйнай бошлаган. Мураббий Алваро Арбелоа вазиятни тўғрилаш учун уларни машғулотда битта жамоа сафида ўйнатган. Лекин вазият юмшамаган.

As нашри ёзишича, кийим алмаштириш хонасида Валверде Чуаменини бир кун олдин бўлган жанжални ОАВга сиздиришда айблаган. Орелиен эса буни қатъий рад қилиб, жамоадошидан уни айблашни тўхтатишни талаб қилган. Феде эса тўхтамаган, шундан сўнг Орелиен унга мушт туширган. Зарбадан сўнг Валверде йиқилган ва стол бурчагига урилиб боши ёрилган. Шундан сўнг уни шифохонага олиб кетишган ва бошини тикишган.

Валверденинг раддияси

Ҳозирда футболчи базага қайтган. «Реал» матбуот хизмати расмий баёнотида айтилишича, унда бош мия жароҳати қайд этилган. Бундай ҳолатларда футболчи икки ҳафтагача майдонга туша олмаслиги мумкин.

Кўп ўтмай Валверде ижтимоий тармоқлардаги саҳифасида ҳолат юзасидан изоҳ берди: у вазият бўрттириб юборилгани, бу ҳар қандай жамоада бўлиши мумкин бўлган ҳолатлиги ва бундай хабар кийим алмаштириш хонасидан ташқарига чиқмаслиги кераклигини айтган. 

«Жамоадошим мени ургани йўқ, мен ҳам уни урмадим. Лекин тушунаман: биз муштлашганимизга ёки бу атайлаб қилинганига ишонишингиз осонроқ, лекин ундай эмас. Баҳс пайтида мен тасодифан столга урилдим, бу эса пешонамда кичик тирналишга ва шифохонага боришимга сабаб бўлди», – дея ёзган Феде.

Футболчи «Реал»нинг оғир мавсуми ва Чемпионлар лигасини тарк этишни қабул қилиш оғир бўлганини тан олган.

«Биз яна бир йилни беҳуда сарфладик. Мен ғазаб ва аламимни ичимга ютардим, аммо охир-оқибат ҳаммаси бемаъни жанжалга айланиб кетди», – деган футболчи.

У бўлган воқеа учун узр сўраган ва ҳамон клубга содиқлигини қайд этган.

«Реал» – ҳаётимдаги энг муҳим нарсалардан бири ва мен унга бефарқ бўла олмайман», – дея қўшимча қилган уругвайлик футболчи.

Валверде ўз мурожаатини шундай якунлаган: «Мен клуб ва жамоадошларим зарур деб ҳисоблаган ҳар қандай қарорга рози бўламан».

Футболчилар жазоланади

«Реал» клубига яқин бўлган журналистлар бу воқеа раҳбариятнинг ғазабини келтиргани, икки футболчи ҳам интизомсизлиги учун қатъий жазоланиши ҳақида ёзишди.

Кўп ўтмай «Реал» клуби Валверде ва Чуамени ўртасида чиққан можарони расман тасдиқлаб, уларга нисбатан интизомий иш очилганини маълум қилди:

«Реал Мадрид футбол клуби эрталабки машғулот пайтида Федерико Вальверде ҳамда Орельен Чуамени ўртасида рўй берган вазият юзасидан суриштирув ишларини бошланганини маълум қилади. Клуб тегишли жараёнларни якунлаганидан кейин икки футболчига нисбатан қўлланган чоралар ҳақида батафсил маълумот беради».

Бундай ҳолатлар учун футболчилар бир неча ўйинга четлатилиб, молиявий жарима қўлланиши мумкин. Ички протоколга кўра, жиддий даражада муаммо келтириб чиққан футболчилар билан шартнома бекор қилиниши ҳам кўзда тутилган.

Умуман олганда, хаос «Реал» учун одатий ҳолга айланган. Хабарларга кўра, жамоа аъзолари икки гуруҳга ажралиб олган ва ўзаро мулоқот қилмайди. Олти нафар футболчи эса бош мураббий Алваро Арбелоанинг сўзларига қулоқ тутмайди.

Бу вақтда клуб ҳимоячилари Антонио Рюдигер ва Алваро Каррерас ўртасида ҳам сўнгги вақтларда икки бор жанжал рўй бергани ҳақида ҳам хабарлар тарқалган. Mundo Deportivo маълумотига кўра, иккинчи жанжалдан кейин жамоадошлари Рюдигерни узр сўрашга мажбур қилишган.

Мбаппе билан боғлиқ вазият

Бу воқеалар Килиан Мбаппе билан боғлиқ катта можаро фонида рўй бермоқда: жароҳатланган ҳужумчи тикланиш жараёнини ўташ ўрнига севгилиси билан Италияга кетиб қолиши жамоадошларини ҳам, клуб мухлисларини ҳам ғазаблантирган. Мухлислар франциялик футболчини жамоадан кетказиш талаби билан петиция бошлаган ва у аллақачон 34 миллион киши томонидан имзоланган.

Лекин Мбаппе аллақачон клуб базасига қайтди ва афтидан ҳеч нарсадан хавотирда эмас – у тез орада майдонга қайтиши ҳам мумкин. Чуамени ва Валверденинг жанжали рўй берган машғулотда Килиан ҳам бор эди ва базани жуда мамнун ҳолатда тарк этган. Журналистлар ҳужумчи базадан қаттиқ кулганча чиқиб кетаётганини кўришган.

Мендининг оғир жароҳати

Бу вақтда мадридликлар таркибида яна бир жиддий йўқотиш рўй берди. Мавсумнинг катта қисмини жароҳатини даволаш билан ўтказиб юборган ҳимоячи Ферлан Менди ла лиганинг 34-тури доирасида «Эспанёл»га қарши кечган ўйинда (2:0) яна жароҳат олди. У ўйин бошида тезлик олаётганида бел қисмида оғриқ сезди ва газонга ўтириб олди.

Аввалига шифокорлар унинг даволаниш ва тикланиш жараёни беш ой давом этишини прогноз қилишганди. Аммо 7 май куни Менди ўнг сон мушагининг пайи узилгани ва операция қилиниши, камида бир йилни ўтказиб юбориши маълум қилди. COPE нашри маълумотига кўра, энди 30 ёшли француз футболчилик фаолиятини якунлаш ҳақида ўйламоқда.

Шундай муаммолар гирдобида қолган «Реал» 10 май куни «Камп Ноу»га сафар қилади ва ла лиганинг 35-тури доирасида «Барселона»га қарши майдонга тушади. Каталонияликлар шу куни чемпионга айланиши мумкин – бунинг учун мезбонлар азалий рақибига ютқазмаслигининг ўзи етарли бўлади. Мадридликлар бу ўйинга қандай ҳолатда бориши ҳисобга олинса, бу қийин вазифа бўлиб кўринмаяпти.