Мальдини спортнинг бошқа турида фаолият бошлади

«Милан»нинг собиқ футболчиси, 2009 йилда футболчилик фаолиятини якунлаган ва бу йилда 49 ёшини нишонлайдиган Паоло Мальдини ATP Milan Challenger турнирига тайёргарлик кўрмоқда.

Жуфтлик баҳсларида иштирок этувчи Мальдини мураббийи Стефано Ландонио билан бирга турнир учун саралаш ўйинида ғолиб чиқиб, wild card қўлга киритган.

Миландаги турнир 26 июнь куни бошланади – бу собиқ футболчи 49 ёшга тўладиган кундир.

«Биз янада яхшироқ ўйнашимиз мумкинлигини биламиз. Бу бизнинг илк турнир, аммо биз Паоло билан хайрия мақсадларида ташкиллаштирилган кўргазма турнирларда қатнашганмиз. Эҳтимол, Паоло футболни танламаганида, яхши теннисчи бўларди. У жуда кеч, бундан 5 йил олдин шуғулланишни бошлаганди. Агар аввалроқ теннисга қадам қўйганида, унда айрим техник муаммолар бўлмасди. Унинг футболдаги муваффақиятларини ҳисобга оладиган бўлсак, у теннисда ҳам муваффақиятларга эриша оларди деб айтишим мумкин», — дея Ландонионинг сўзларини келтирган Tennis Italiano.