Алмазбек Атамбоев Ўзбекистонга расмий ташриф билан келади

Қирғизистон президенти Алмазбек Атамбаев Ўзбекистонга расмий ташриф билан келишни режалаштирмоқда. Бу ҳақда бугун Ўзбекистон делегациясининг Бишкекка ташрифи давомида ўтказилган икки мамлакат ҳукуматлари йиғилиши вақтида маълум бўлган.

Қирғизистон бош вазири Сооронбай Жээнбеков Ўзбекистон ҳукумати раҳбари илк марта Қирғизистонга расмий ташриф билан келганини эътироф этган.

«Ўзбекистон бош вазири Абдулла Ариповни Қирғизистон заминида кўриб турганимиздан хурсандмиз. Бу мустақиллик йилларида илк марта Ўзбекистон ҳукумати раҳбари Қирғизистонга келиши бўлмоқда.

Бу ташриф президент Қирғизистон Республикаси президенти Алмазбек Шаршенович Атамбоевнинг Ўзбекистонга расмий ташрифи арафасида рўй берди», деган у.

Эслатиб ўтамиз, шу йилнинг июнь ойи бошида Остонада ўтказилган ШҲТ саммити вақтида Шавкат Мирзиёев Алмазбек Атамбоев билан учрашган ва уни Ўзбекистонга таклиф қилганди.

Атамбаев ўтган йилнинг 24 декабрида Ўзбекистонга амалий ташриф билан келганди.