Эрон янги баллистик ракетани муваффақиятли синовдан ўтказганини эълон қилди

Эронда янги "Хуррамшаҳр" баллистик ракетаси муваффақиятли синовдан ўтказилди. Ракетанинг учирилиши видеоси Эроннинг PressTV телеканали сайтида жойлаштирилган. 

22 сентябрда ракета Теҳрондаги ҳарбий парадда илк бор намойиш қилинганди. Ислом инқилоби қўриқчилари корпуси бригада генерали Амир-Али Ҳожизода маълум қилганидек, ракетанинг учиш узоқлиги 2 минг км ташкил қилади. У, шунингдек, бир нечта жанговар каллакни ташишга қодир. Ҳожизоданинг айтишича, ракета яқин келажакда қуролланишга олинади.

Теҳронда ўтган парадни Эрон президенти Ҳасан Руҳоний ҳам кузатган. Унинг айтишича, Эрон ўз ҳарбий салоҳиятини келгусида ҳам ошириб боради ва бошқа давлатлар бунга халақит қила олмайдилар. Руҳонийнинг таъкидлашича, Эрон ўзининг мудофаа салоҳиятини ҳеч қачон ҳужум қилиш учун қўлламаган. У, шунингдек, Эрон 2015 йилда ядро дастури бўйича эришилган келишувга содиқлигини айтган.

Ҳарбий парад 1980-1988-йиллардаги Эрон-Ироқ уруши хотирасига муқаддас мудофаа ҳафталиги бошлангани шарафига ўтди. Бу тадбир Эронда ҳар йили ўтказилади. Янги ракета эса бу урушдаги илк жанглардан бири борган чегарадаги Хуррамшаҳр шаҳри шарафига шундай аталди.