Жозеп Бартомеу Каталония мустақил бўлса, «Барселона» тутадиган йўл ҳақида гапирди

Фото: Don Balón

«Барселона» президенти Жозе Бартомеу Каталониядаги референдум кунига тўғри келган «Лас-Пальмас» билан учрашувни қолдирмасдан ўтказишга қарор қилгани, фаолиятидаги энг оғир қарор бўлганини таъкидлади. Мухлисларсиз ўтган учрашувда «Барселона» 3:0 ҳисобида ғалаба қозонганди.

«Кўп мухлислар учрашув қолдирилишини исташганини яхши тушуниб турибмиз. Шу боисдан ҳам бу президентлик фаолиятимдаги энг қийин қарорлардан бири бўлганини айтишни истаган бўлардим. Биз ўйинни қолдириш учун кўп уриндик, аммо буни уддалай олмадик. Лига илтимосимизга умуман кўнмади.

Агар Каталония мустақил бўлишига тўхталадиган бўлсак, агар шундай воқеа содир бўлса клуб қайси чемпионатда ўйнашни ўзи ҳал қилади», — дея Бартомеунинг сўзларини келтиради Мarca .

Эслатиб ўтамиз, олдинроқ Каталония спорт вазири Херард Фигерас маҳаллий клуб истаса, Англия, Италия ёки Франция чемпионатида тўп суриши мумкинлигини таъкидлаб ўтганди.

#Барселона #Каталония #Жозеп Бартомеу

Испаниянинг шимолий-шарқий ҳудудида, Каталония автономиясида, истиқомат қилувчи аҳоли 1 октябрь каталонларнинг мустақиллик масаласини ҳал этиш учун кўчага чиқди. Расмий Мадрид ушбу ҳаракатни йўққа чиқариш мақсадида маҳаллий полиция кучидан фойдаланмоқда.