Роналду: «Месси-Роналду даври тугамади, у энди бошланмоқда»

Мадриднинг «Реал» клуби ҳужумчиси Криштиану Роналдунинг ишонч билдиришича, у ҳамда «Барселона» форварди Лионель Месси футбол ишқибозларини ҳали кўп хурсанд қилишади. Португалия терма жамоаси футболчиси бу ҳақда ФИФА томонидан 2017 йилнинг энг яхши футболчиси, деб тан олинганидан сўнг айтиб ўтди.

«Мен ҳар куни кечқурун хотиржам уйқуга ётаман. Шахсий ва жамоавий даражада эришаётган ютуқларимдан кўнглим тўлмоқда. Мен Месси билан эмас, балки энг яхши бўлиш ҳамда совринларни ютиб олиш учун курашмоқдаман. Бироқ, шуни ҳам айтишим мумкинки, Месси-Роналду даври тугамади, у энди бошланмоқда», - дея Роналдунинг сўзларини келтиради Marca.

Жорий йилда Роналду «Реал» билан Испания чемпионати ва Суперкубок, ЕЧЛ ҳамда УЕФА Суперкубогида ғалаба қозонди. Португалиялик ЕЧЛдаги 13та ўйинда 12та гол уриб, энг яхши тўпурарга айланди.

Роналду ФИФА’нинг The Best совринини кетма-кет иккинчи марта ютиб олди. Бундан ташқари, 32 ёшли форвард «Олтин тўп» ҳамда «ФИФА Олтин тўп»ини икки мартадан қўлга киритган. 2008 йилда эса «ФИФА йил ўйинчиси» совринига эгалик қилган.