АҚШ ва Вьетнам компаниялари АҚШ президенти Дональд Трампнинг Вьетнамга сафари доирасида умумий миқдори 12 млрд доллар бўлган бир нечта савдо битимлари тузишди. Бу ҳақда Оқ уй баёнотида маълум қилинган.
“АҚШ ва Вьетнам етакчилари Трампнинг ташрифи вақтида 12 млрд долларлик савдо битимлари тузилганини қутлашди”, дейилган хабар матнида. Иккала давлат етакчиси энергетика соҳасида алоқалар кенгайганини, жумладан Вьетнамга АҚШнинг суюлтирилган гази етказиб берилиши имконияти муҳокама қилинганини таъкидлаб ўтишган. Бундан ташқари, АҚШ Вьетнамга қуёш энергетикасини ривожлантиришда кўмак беришга тайёрлигини билдирган.
Трамп ва Вьетнам президенти Чан Дай Куанг мавжуд савдо баҳслари бўйича, жумладан, қишлоқ хўжалиги маҳсулотлари етказиб берилиши, электрон тўловларни соддалаштириш ва интеллектуал мулкка ҳуқуқларни муҳофаза қилиш масалалари бўйича ечимлар топишга келишиб олишган.