Тошкентда халқаро медиа-форум бўлиб ўтади

2017 йилнинг 28-29 ноябрь кунлари ЎЭОАВМАнинг MEDIA HALL'ида “Ўзбекистон маданий мероси” мультимедиа лойиҳаси доирасида  “Замонлар чорраҳаси: ўтмишнинг буюк мероси – маърифатли келажак пойдевори” халқаро медиа-форуми бўлиб ўтади.

Форумда 100 дан ортиқ хорижлик олим, эксперт, дипломат, шунингдек илм-фан, маҳаллий ва хорижлик ОАВ вакиллари иштирок этишади. Иштирокчилар орасида Россия, Канада, Италия, Буюк Британия, Ҳиндистон, Бельгия, Нидерландия, Франция, Германия, Чехия, АҚШ, Туркия, Греция, Озарбойжондан келган таниқли олимлар, музей ва илмий-тадқиқот институтининг вакиллари, илмий журнал муҳаррирлари,  ЮНЕСКО ва ICOMOS (Меъморий ёдгорлик ҳамда аҳамиятга молик жойларни сақлаш халқаро кенгаши) ташкилотининг аъзолари ва Ўзбекистоннинг бой маданий-тарихий меросига бағишланган кўп сонли китоб, нашрлар муаллифлари бор. 

Форум доирасида Ўзбекистон ҳудудидан топилган ва дунёнинг турли мамлакатлари музейларида сақланаётган ноёб моддий ҳамда маданий мерос объектларига бағишланган маърузалар тингланади.