АҚШ конгрессининг қуйи палатаси АҚШ президенти Дональд Трампнинг импичменти бўйича резолюция лойиҳасини маъқулламади. Бу Трамп бўйича овозга қўйилган илк шундай қонун лойиҳаси бўлди. Резолюциянинг қабул қилинишига 364 конгрессмен қарши чиқди, 58 нафари эса маъқуллади.
Ҳужжат Техас штатидан демократ Эл Грин томондан овоз беришга олиб чиқилган. Резолюцияда Трампга 5 банд бўйича, жумладан, ФҚБ директори Жеймс Комини ишдан бўшатиш айблови қўйилган. Бу банд бўйича айблов Трамп томондан хизмат лавозимининг суистеъмол қилиниши сифатида баҳоланмоқда.
Гриннинг партиядошлари ҳам бундай кескин қадамни қўллаб-қувватлашмади. Демократларнинг қуйи палатадаги етакчиси Нэнси Пелосининг айтишича, “Трампнинг мамлакатни бошқаришга қодирлиги масаласи объектив бўлса-да, ҳозир бу ҳужжатни кўриш вақти эмас”. Кўпчилик конгрессменлар Трамп жамоаси аъзоларининг Россия билан алоқалари ва Россиянинг АҚШдаги сайловолди кампаниясига аралашуви бўйича тергов натижаларини кутишни таклиф қилишмоқда.
Импичмент давлатга хиёнат қилиш, порахўрлик ёки бошқа оғир жиноятлар ва қонунбузарликларда айбланган АҚШ федерал хизматчилари, жумладан президентни жавобгарликка тортишни кўзда тутади. Импичмент эълон қилиш ҳуқуқи конгресснинг қуйи палатасига тегишли, суд йиғилишлари эса юқори палата - сенатда АҚШ олий суди судьяси раислигида ўтади. Мансабдор шахсни ўз лавозимидан бўшатиш учун айблов сенаторларнинг учдан икки қисми томондан қўллаб-қувватланиши керак.
АҚШда президентларнинг импичменти жараёни уч марта амалга оширилган. 1868 йилда президент Эндрю Жонсон ҳарбий вазирни ноқонуний бўшатганликда айбланган. 1998-1999 йилларда Билл Клинтон ёлғон гувоҳлик бериш ва қонунга қаршилик кўрсатишда айбланган. Уларнинг иккиси ҳам сенат томондан оқланган.
1969-1974 йилларда Оқ уйни бошқарган Ричард Никсон эса сенатдаги жараёнгача ўзи истеъфога кетган.
