АҚШ НАТОдаги аъзолигини қайта кўриб чиқиши мумкин

Президент Дональд Трамп НАТО бош котиби Марк Рютте билан учрашувда АҚШнинг алянсдан чиқиши эҳтимолини муҳокама қилмоқчи.

«Ўйлашимча, президент бу масалани бир неча соатдан сўнг бош котиб Рютте билан муҳокама қилади», — деди Оқ уй матбуот котиби Кэролайн Ливитт 8 апрел, чоршанба куни Вашингтонда. Унинг айтишича, Трамп Рютте билан «жуда очиқ ва холис суҳбат» ўтказмоқчи.

Ливитт Трампнинг иттифоқчилар АҚШни Эрон билан урушда ёлғиз ташлаб қўйгани ҳақидаги айбловини такрорлади. Унинг сўзларига кўра, НАТО «сўнгги олти ҳафта ичида Қўшма Штатлардан юз ўгирди». Шунингдек, у НАТО бу синовдан «ўта олмаганини» айтди. Трамп Европа иттифоқчилари АҚШга Ҳўрмуз бўғозини яна кема қатнови учун очишда ёрдам беришни истамаётганидан бир неча бор норозилик билдирган.

Бундан аввал Трамп ва давлат котиби Марко Рубио Эрон билан уруш тугаганидан кейин АҚШнинг НАТОдаги аъзолигини қайта кўриб чиқиш нияти борлигини эълон қилган эди. Кейинчалик Марк Рютте ҳар икки томон позициясини тушунишини билдирган. У Трамп ва Шимолий Атлантика алянсининг бошқа аъзолари ўртасида воситачи сифатида қаралади.

НАТО вакилининг сўзларига кўра, Рютте ва Трамп «хавфсизлик соҳасидаги жорий вазият»ни ҳам муҳокама қилишни режалаштирган. Бу мавзулар қаторида «Эрон масаласи, шунингдек, Россиянинг Украинага қарши давом этаётган тажовузкор уруши» ҳам бор. Хабар қилинишича, кун тартибидаги яна бир масала — мудофаа саноати соҳасида трансатлантик ҳамкорликни янада чуқурлаштиришдан иборат.