Трампнинг қароргоҳи ёнида отиб ўлдирилган шахс 21 ёшли рассом бўлган

22 феврал, якшанбага ўтар кечаси АҚШ президенти Дональд Трампнинг Флорида штатидан жой олган Мар-а-Лаго қароргоҳи атрофидаги қўриқланадиган ҳудудга кириб борган ва Махфий хизмат ходимлари томонидан отиб ташланган қуролланган эркак 21 ёшли рассом Остин Такер Мартин бўлиб чиққан. У Шимолий Каролина штатидаги Кэмерон шаҳридан бўлган. Америка ОАВ унинг шахсини Шимолий Каролинадаги Мур округи шерифи баёноти ва марҳумнинг оила аъзолари эълон қилган маълумотларига таяниб аниқлаган.

Ҳуқуқ-тартибот идоралари тарқатган пресс-релизда айтилишича, якшанба кечаси Мартиннинг қариндошларидан бири шерифга мурожаат қилиб, унинг шанбадан бери бедарак йўқолганини билдирган. Шундан сўнг у бедарак йўқолганлар базасига киритилган. Бироз вақт ўтиб, федерал ҳокимият шериф идорасини “Флоридада Мартинга доир фаол тергов олиб борилаётгани” ҳақида хабардор қилган.

“Уларнинг илтимосига кўра, бедарак йўқолган шахс бўйича ишга оид маълумотлар федерал терговчиларга топширилди. Мур округи шерифи идорасида Мартинга доир ҳеч қандай иш унинг бедарак йўқолгани ҳақидаги хабаргача бўлмаган. Отишма ёки унга боғлиқ тергов ҳаракатлари бўйича ҳар қандай саволлар Майамидаги ФТБ идорасига ва АҚШ Махфий хизматига йўналтирилиши керак”, — дейилади шериф идораси изоҳида.

ABC News’га Мартиннинг амакиваччаси Брейден Филдс айтишича, Мартин “жуда тинч” бўлган ва қурол билан муомала қилишда тажрибасиз эди. Шу билан бирга, у голф-клубларда расм чизишни яхши кўрган ва шундай клублардан бирида ишлаган. Филдснинг сўзларига кўра, Мартин ижтимоий тармоқларда голф майдонларининг суратлари ва чизган расмларини мунтазам жойлаб борган, 2025 йилда эса голф майдонларини буюртма асосида тасвирлашга ихтисослашган компания очган.

Филдс, шунингдек, қариндоши қуролга қизиқмаслигини айтган: “Биз уни ўқ отишга олиб борганмиз, лекин у ҳатто қуролга тегмаган. У ишлатган ягона нарса — пневматик милтиқ (ҳаво босими билан ўқ отадиган қурол) эди”, — деган у.

Филдс яна Мартиннинг оила аъзолари “Трампнинг катта тарафдорлари” эканини маълум қилган. Бироқ унинг айтишича, отиб ўлдирилган йигит “сиёсат ҳақида деярли гапирмасди, унга аралашишни ҳам истамасди”. The New York Times қайд этишича, сайловчилар рўйхатида Мартин мустақил сайловчи сифатида (яъни, ҳеч қайси партияга боғланмаган ҳолда) рўйхатдан ўтган.

Қуролланган эркак Мар-а-Лаго ҳудудига маҳаллий вақт билан тахминан соат 1:30 лар атрофида киришга уринган. Қайд этилишича, у бошқа бир автомашина қароргоҳдан чиқиб кетаётган пайтда дарвозалар очиқ турганидан фойдаланиб, ҳудудга кириб олган. Мартиннинг оила аъзолари айтишича, у кумушранг Volkswagen машинасида кетганидан кейин бедарак йўқолган. Флорида штатидаги Палм-Бич округи шерифига кўра, худди шундай автомашина воқеа жойидан унча узоқ бўлмаган ерда топилган.

Шериф, шунингдек, қароргоҳга кирган шахсга “ўзи билан олиб келган икки ашёни ташлаб юбориш” буйруғи берилганини айтган. “Шу пайт у бензин солинган канистрани туширди ва милтиқни ўқ отиш ҳолатига кўтарди”, — деган шериф. Шундан кейин икки агент ва шериф ўринбосари “хавфни бартараф этиш учун қуролидан ўқ узган”.

Шериф идораси, шунингдек, Мартин ўзи билан олиб келгани айтилган милтиқ ва бензин канистраси туширилган суратни ҳам эълон қилган.