Чемпионлик пойгаси декабрда тугади. АПЛда тур якунлари

«Трибуна» Англия чемпионатининг 16-тури якунларини таҳлил қилади.

МАНЧЕСТЕР ДЕРБИСИ

Ўтган йилнинг сентябрида «Манчестер Юнайтед» «Олд Траффорд»да «шаҳарлик»ларга 1:2 ҳисобида мағлубиятга учраганди. Ўша ўйиндан кейин жамоа ўз майдонида 40 ўйин ўтказди ва бирор марта ҳам мағлубиятга учрамасдан, ажойиб серия қайд этди. Мана шу қирқ ўйинда ҳеч қайси жамоа «Манчестер Юнайтед» дарвозасини икки бор нишонга олишнинг уддасидан чиқа олмаганди. Бунга яна Моуриньо ўз мураббийлик фаолиятида бирор марта ҳам якшанба кунга белгиланган уй учрашувида мағлубиятга учрамаганини, «МЮ» бу мавсумда ўз майдонида юз фоизлик натижа қайд этиб турган ягона жамоа бўлганини ҳам эътиборга олсак, «Манчестер Сити» бир зарба билан мезбонларнинг бир қанча серияларига барҳам бера олишганини айтишимиз мумкин.

Жуда катта аҳамият касб этган ўйинда ҳар уч гол ҳам ҳимоячиларнинг қўпол хатоларидан сўнг киритилгани бироз ғалати. Ўйиндан олдин Гвардиола рақиб футболчиларининг жисмоний кўрсаткичларига эътибор қаратган ва стандарт вазиятларда мезбонларнинг устунлигини тахмин қилганди.

Аксинча, «Сити» ҳар икки голни ҳам стандарт вазиятдан сўнг киритди. Ҳар икки вазиятда ҳам ҳимоячиларга ёрдамга келган Ромелу Лукаку тўпни қайтаришда хатога йўл қўйди ва аввалига, Сильва, кейин эса, Отаменди яқин масофадан дарвозани ишғол қилишди.

Шу ўринда, «Манчестер Сити» ўтган турда ҳам «Вест Ҳэм» устидан 2:1 ҳисобида ғалаба қозонганликлари ва ўша ўйинда ҳам голларни айнан Отаменди ва Силва киритганини эътироф этиш керак.

Мезбонларнинг ягона голи ҳам ҳимоячилар хатоси маҳсулидир. Фабиан Дельф жарима майдонига юқорилатиб оширилган тўпни дарвозабонга бераман деб, тўпга кўнгилдагидек эгалик қила олмади ва вазиятни пойлаб турган Маркус Рэшфордни Эдерсон қаршисида ёлғиз қолдирди.

Голлардан ташқари, ўйин давомида Лукаку, Рэшфорд, Бернарду Силва ва Лерой Сане жуда қулай имкониятларга эга бўлишди, бу вазиятларда дарвозабонларнинг қўли баланд келди.

Шунингдек, Габриел Жезус ва Андер Эрреранинг ўхшаш вазиятда жарима майдонида йиқилиб тушишлари ҳакам томонидан беэътибор қолдирилди.

Энди «Манчестер Сити» яқин таъқибчисидан 11 очколик фарқ билан олдинга чиқиб олди – бу фарқ турдан-турга ошаётганини эътиборга олсак, Пеп Гвардиола шогирдлари чемпионликни фақат ўз айблари билангина бой бериб қўйишлари мумкин холос.

ЛОНДОН КУРАШДАН ЧИҚДИМИ?

Манчестер жамоаларининг ўзаро ўйинидан, уларни таъқиб қилаётган Лондон жамоалари фойдалана олмади.

«Вест Ҳэм» меҳмони бўлган Антонио Конте шогирдлари 0:1 ҳисобида мағлубиятга учради ва «Манчестер Юнайтед»га очколар бўйича етиб олиш имкониятини қўлдан чиқаришди. «Арсенал» эса фақат сўнгги дақиқаларда Жирунинг голи эвазигагина мағлубиятдан қутулиб қолди.

Натижада, эндиликда «Челси» турнир пешқадамидан 14 очко ортда бормоқда. «Арсенал» ва «Тоттенҳэм»нинг эса, «Манчестер Сити» билан орасидаги фарқи мос равишда 17 ва 18 очкони ташкил қилмоқда.

Бу ҳолатда бемалол «Арсенал», «Тоттенҳэм» ва «Челси»нинг кўпроқ кучли тўртлик ҳақида ўйлай бошлашини тахмин қилиш мумкин.

«ЛИВЕРПУЛЬ»НИНГ (АНТИ) РЕКОРДИ

«Ливерпуль» «Эвертон»га қарши кечган «Энфилд»даги навбатдаги дербида Премьер-лиганинг ўзига хос рекордини қайд этди. Клопп жамоаси ўйин давомида 79 фоиз вақтда тўпни ўз назоратида ушлаб турди. Бу бир жамоанинг бир ўйиндаги энг катта кўрсаткичидир.

Бу ҳолатнинг антирекордлиги шундаки, «Ливерпуль» мана шундай ўйинда ғалаба қозона олмади. Яъни, биратўла, энг катта устунлик билан ғалаба қозона олмаган жамоа сифатида ҳам тарихга кириб қолди.

«Ливерпуль» ўйин давомида 23 марта рақиб дарвозаси томон зарба берди, 12 бор бурчак тўпи тепди, 732 маротаба тўп оширишни амалга оширди аммо, дарвозага атиги 2 зарба берган, 1 марта бурчак тўпи тепиб, уч ярим баробар кам тўп оширишларни амалга оширган «Эвертон» билан 1:1 ҳисобини қайд этди.

Ўйиннинг 77-дақиқасида мезбонлар ҳимоячи Деян Ловрен умуман кераксиз вазиятда рақибга пенальти ишлаш имкониятини яратди ва Уэйн Руни «мерсисайд» дербисидаги илк голини киритиб, ҳисобни тенглаштирди.

КЛОППНИНГ ТУШУНАРСИЗ ҚАРОРИ

Ливерпуль дербиси олдидан, мезбонлар мураббийи Юрген Клоппнинг ушбу ўйинга танлаган таркиби барчани ҳайрон қолдирди. Жамоа етакчиси, «Спартак» дарвозасида ҳет-трик қайд этиб, ажойиб спорт формасини намойиш қилган Филиппе Коутиньо, ҳамда тўпурар ҳужумчилардан бири Роберто Фирмино захирада қолдирилган, ҳужумга эса, ҳали жамоа таркибида бирорта ҳам гол ура олмаган, 19 ёшли Соланке қўйилганди.

Захирада қолган ҳужумчиларда жароҳатлар йўқ эди, уч кун ўтиб яна «Энфилд»да бўлиб ўтадиган «Вест Бромвич»га қарши ўйиннинг дербидан кўра аҳамиятлироқ жиҳати ҳам йўқ эди.

Клопп бу ротацияни ўзига хос тарзда изоҳлади: «Соланке инглиз футболчиси, мен унинг дерби аҳамиятини бошқалардан яхшироқ тушунади, деган мақсадда танладим».

Аммо бу дербининг аҳамиятини Клоппнинг ўзи яхши ҳис қилмаган кўринади, ахир таркибда ўзгартиришларни амалга ошириш, ёш футболчиларга имкон бериш учун бошқа ўйинлардан фойдаланса ҳам бўларди.

ЖИРУ – «ЗАХИРАДАГИ ҚИРОЛ»

«Саутҳэмптон»га қарши деярли бутун ўйин давомида ҳисобда орқада борган Арсен Венгер жамоаси захирадан майдонга чиққан Оливье Жирунинг боши билан урган голи ҳисобига бир очкони қўлга киритди.

Франциялик ҳужумчининг бу голи унинг захирадан майдонга тушиб киритган 17-голи бўлди ва бу борада АПЛ рекордчиси Оле Гуннар Сульшерга етиб олди. Норвегиялик ҳужумчи, эсингизда бўлса, «Манчестер Юнайтед»нинг захира «қуроли» бўлган ва жуда кўп ўйинларда иккинчи бўлимда тушиб, муҳим голлар муаллифига айланганди.

Арсен Венгернинг Жируга нисбатан фикри ўзгармаётгани ва катта эҳтимол билан кейинги ўйинларда ҳам Жирунинг захирада қолиши мумкинлигини эътиборга олсак, 31 ёшли ҳужумчи ушбу мавсумдаёқ ягона рекордчи бўлиб олиши мумкин.

ТУР ИҚТИБОСИ:

«Одамлар бундай футбол услуби билан фақат Испанияда ўйнаш мумкин, деб ҳисоблашарди. Аммо биз Англияда ҳам бундай ўйнаш мумкинлигини исботладик» - ПЕП ГВАРДИОЛА

РАҚАМЛАР

«Арсенал» 18 йилдан бери «Саутҳэмптон» устидан сафарда кетма-кет икки марта ғалаба қозона олмаяпти.
«Манчестер Сити» 16 ўйиндан сўнг 46 очко тўплади, бу очко билан ўтган мавсум якунига кўра бемалол кучли саккизликдан жой олиш мумкин эди.
«Кристал Пэлас» ҳужумчиси Кристиан Бентеке ушбу мавсуда рақиб дарвозасига 24 маротаба зарба йўллади, аммо бирорта ҳам гол ура олмади.
Ҳарри Кейн АПЛ даги ўзининг 90-голини 131-ўйинида уришга муваффақ бўлди. Фақат Алан Ширер (113 ўйин) яхшироқ самарадорлик кўрсата олган холос.
«Сток Сити» ҳимоячиси Райан Шоукросс ўзининг 6-автоголини урди. Фақат Ричард Данн (10), Жейми Каррагер (7) ва Мартин Шкртелда (7) кўпроқ автогол бор.
«Тоттенҳэм» қаторасига 4 ўйинда «Сток Сити» устидан 4 тўп фарқи билан устун келди. Бу ўйинларда Ҳарри Кейн 8 гол уришга муваффақ бўлган.
Давид Мойес мураббий сифатида жорий чемпионга қарши ўз майдонида ўтказган сўнгги 6 ўйиннинг 5тасида ғалаба қозонишнинг уддасидан чиққан.
«Вест Ҳэм»га қарши ўйиннинг биринчи бўлимини бой берган «Челси» якунда мағлубиятга учради. Антонио Конте бошчилигида лондонликлар фақат бир марта биринчи бўлими бой берилган ўйинни ғалаба билан якунлашган, холос. Бу ўтган йили «Манчестер Сити»га қарши сафарда кечган ўйинда бўлганди.

16-тур ўйинлари