Месси яна пенальтидан гол уролмади, лекин «Барселона» йирик ғалабага эришди

Испания чемпионатининг 16-турида «Барселона» ўз майдонида «Депортиво»ни қабул қилди. «Камп Ноу»да ўтган учрашувда мезбонлар жамоасининг 4:0 ҳисобидаги йирик ғалабаси қайд этилди.

Ғолиб жамоа сафида голларни дубллар қайд қилган Луис Суарес ва Паулиньо ўз ҳисобларига ёзиб қўйишди.

Лионель Месси 70-дақиқада пенальтини аниқ амалга ошира олмади.

Аргентиналик футболчи учун бу 2017 йил давомида учинчи марта пенальтидан адашиш бўлди. Охирги марта «Барселона» футболчиси бир календарь йили ичида қаторасига учта пенальти зарбасини голга айлантира олмаслиги 12 йил муқаддам кузатилганди. 2005 йилда камерунлик футболчи Самуэль Это'о ҳам жамоанинг Испания чемпионатидаги ўйинларида 11 метрли нуқтадан 3 марта хато қилганди.

Месси жорий мавсумда Испания чемпионатининг 16 ўйинида 14 гол урган (биттаси пенальтидан) ва 7та голга ассистентлик қилган.

Каталонлар клуби бу ғалаба эвазига жорий мавсумдаги мағлубиятсиз сериясини 16 ўйинга етказиб қўйди.

«Барса» 42 очко билан мусобақа жадвалида пешқадамликни давом эттирмоқда. Клуб энг яқин таъқибчиси «Атлетико»дан 6 очкога ўзиб кетган. «Барселона» билан кейинги турда (23 декабрь) тўқнаш келадиган «Реал» 31 очко билан 4-ўринни эгаллаб турибди, «Депортиво» эса 15 очко билан 17-ўринни банд этган.

Испания Примераси. 16-тур
Барселона – Депортиво - 4:0
Голлар: 1:0 – 29 Суарес, 2:0 – 41 Паулиньо, 3:0 – 47 Суарес, 4:0 – 75 Паулиньо.
Барселона – тер Стеген, Серджи Роберто, Пике, Вермален, Альба (Динь, 81), Иньеста (Андре Гомеш, 56), Ракитич, Паулиньо, Пако Алькасер (Алеиш Видаль, 23), Месси, Суарес.
Депортиво – Мартинес, Хуанфран, Шер, Сидней, Наварро, Гильерме (Вальверде, 63), Борхес, Хиль (Борха Валье, 84), Чолак (Баккали, 63), Адриан, Перес.
Огоҳлантиришлар: Шер (32).
Аниқ амалга оширилмаган пенальти: Лионель Месси (70)