Apple аввалги смартфонларининг ишлашини атайлаб секинлаштиришини тан олди

АҚШнинг Apple корпорацияси iPhone смартфонининг аввалги моделлари ишлашини атайлаб секинлаштиришини тасдиқлади. Бу ҳақда The Wall Street Journal нашри хабар бермоқда.

Нашрнинг маълум қилишича, Apple вакиллари буни фойдаланувчилар ҳақида қайғуришлари билан тушунтиришган. Уларнинг айтишича, смартфонларда ўрнатилган литий-ион аккумуляторлар вақт ўтгани сари кучини йўқотади. Шу сабабли уларнинг қуввати, мисол учун смартфонни совуқ ҳавода ишлатиш вақтида етмаслиги ва бунинг оқибатида қурилма бирдан ўчиб қолиши мумкин. 

Бу юз бермаслиги учун Apple компанияси iOS операцион тизимига ўзгартиришлар киритган. Бу ўзгартиришлар эвазига баъзи дастурлар қувват етмаганда бажарилиши секинлашган. Ушбу ўзгаришлар iPhone 6, 6s ва SE моделларига тааллуқли бўлган, операцион тизим янгиланиши билан iPhone 7’да ҳам пайдо бўлади.