Роналду қаторасига иккинчи марта Европада йилнинг энг яхши спортчиси бўлди

Фото: Marca

Мадриднинг «Реал» клуби ҳужумчиси Криштиану Роналду Европа қитъасининг 2017 йилдаги энг яхши спортчиси деб топилди. Бу ҳақда мадридликлар клуби расмий сайти хабар берган.

Португалиялик 32 ёшли футболчи 26та халқаро информацион агентликлар ўртасида ўтказилган сўровномада биринчи ўринни эгаллади. Кейинги ўринларни «Формула-1» чемпиони Льюис Ҳэмилтон, теннисчилар Рожер Федерер ва Рафаэль Надаль банд этди.

Шу тариқа, 1958 йилдан буён Польшадаги PAP ахборот агентлиги томонидан топшириладиган ушбу мукофотни Роналду иккинчи марта қўлга киритмоқда.

2017 йилда Роналду «Реал» билан Испания чемпиони, Чемпионлар лигаси ғолиби, клублар ўртасидаги чемпионат ғолиби, УЕФА Суперкубоги ва Испания Суперкубогини қўлга киритди. У шунингдек, Португалия терма жамоаси билан 2018 йилги жаҳон чемпионатига йўл олди.