Саудия Арабистони Қатарда тўнтарув ташкиллаштиришдаги айбловларни рад этди  

Саудия Арабистонининг Туркиядаги элчихонаси ўз баёнотида турк ОАВда чоп этилган, қиролликнинг Қатарда давлат тўнтарувини ташкиллаштиргани таъкидланган материалларни қоралаб чиқди ва бу айбловларни рад этди.  

Саудия Арабистонининг твиттердаги саҳифасида жойлаштирилган баёнотда айтилишича, 25 декабрда Gerçek Hayat турк журналида “Туркия Қатардаги тўнтарувнинг олдини олди” деб номланган мақола чоп этилган. Мақолада Саудия Арабистони Қатарда давлат тўнтаруви ташкиллаштиргани таъкидланган. Бу мақолани Yenişafak ва Daily Sabah турк газеталари ҳам чоп этган.

“Биз бу мақолада берилган баландпарвоз таъкидларни рад этамиз ва қироллик Қатар билан июнда муносабатларни узганини тасдиқлаймиз. Қироллик бу маълумотлар ҳеч қандай асосга эга бўлмаган ёлғон гаплар эканини таъкидлайди”, дейилган хабарда.

Саудия Арабистони элчихонаси ОАВни аниқликка риоя қилиш ва маълумотларнинг ҳаққонийлигини текширишга чақирган ва ўзининг бундай баёнотларга қонуний чоралар кўриш ҳуқуқига эгалигини таъкидлаб ўтган. 

Саудия Арабистони, БАА, Баҳрайн ва Миср 5 июнда Қатар билан дипломатик алоқаларни узганди. Қатар мудофаа вазири Ҳолид ал-Аттийя мамлакат атрофида юзага келган инқирозни қўшни давлатлар томондан давлат тўнтарувига уриниш деб атаганди.