«Россия КХДРга қарши барча санкцияларга риоя этмаяпти»

Фото: Reuters

АҚШ давлат котиби Рекс Тиллерсоннинг маълум қилишича, Россия КХДРга қарши барча санкцияларни қўллаётгани йўқ. Бу ҳақда Reuters хабар берди.

«Бизга шуниси аниқки, улар барча санкцияларни қўллаётгани йўқ ҳамда баъзи санкциялардан четлаб ўтиш йўлларига эга эканликлари ҳақида аниқ далиллар бор», - дея маълум қилди Тиллерсон.

Унинг сўзларига кўра, Россия биринчи навбатда ёқилғи етказиб бериш бўйича санкцияларга риоя этаётгани йўқ, бироқ бу бошқа соҳаларга ҳам тегишли бўлмоқда.

Аввалроқ, АҚШ президенти Дональд Трамп Россия Шимолий Корея масаласини ҳал қилишда умуман ёрдам бермаётгани ҳақида айтиб ўтганди. Унинг сўзларига қараганда, Москва Пхеньянга БМТ санкцияларидан қочишда кўмак бермоқда.

Тайёрлаган: Отабек Матназаров

#Россия #АҚШ #КХДР