Порошенко Донбассни қайта интеграция қилиш ҳақидаги қонунни имзолади

Украина президенти Пётр Порошенко ҳарбий кабинет йиғилиши чоғида Донбассни қайта интеграция қилиш ҳақидаги қонунни имзолади, деб ёзмоқда РИА Новости.

Ҳужжат қонуний кучга кириши учун расмий нашр «Украина овози» газетасида чоп этилиши керак.

Ҳужжатни имзолаш чоғида Порошенко ушбу қонун Донбассни сиёсий дипломатик жиҳатдан Киев назорати остига қайтаришнинг «ҳуқуқий механизмини таъминлаб бериши»ни таъкидлади. У шу ондаёқ мудофаа вазири ва Бош штаб раҳбарига 1 апрелгача мамлакат шарқидаги ҳарбий операциялар форматини ўзгартириш ва бирлашган қуролли кучлар қўмондонлигига номзод юзасидан таклифлар тайёрлашни буюрди. 

Қонуннинг моҳияти

Украина Олий Радаси Донбассни қайта интеграция қилиш ҳақидаги қонунни 18 январь куни маъқуллади. Қонун матнида Россия босқинчи давлат деб аталади, мамлакат жануби-шарқий қисмидаги Киевга бўйсунмаётган ҳудудлар «босиб олинган» деб тан олинган. «Вақтинчалик босиб олинган» аҳоли пунктларининг чегаралари ва рўйхати Бош штаб таклифи асосида ва мудофаа вазирлигининг тақдимига кўра президент томонидан аниқлаштирилади.

Қонун президентга тинчлик вақтида қуролли кучлардан мамлакат суверенитетини ҳимоя қилиш учун фойдаланиш ҳуқуқини беради. Бу мамлакат шарқида уруш эълон қилмасдан армиядан фойдаланишни қонунийлаштиради. Бундан ташқари, депутатлар биринчи ўқишдаёқ можарони тартибга солишда Минск келишувларининг устуворлиги ҳақидаги пунктни чиқариб ташлашди. 

Рададаги «Мухолифатчилар блоки» қонунни рад этишга уриниб кўришди, лекин бу таклифни парламент депутатларидан 37 кишигина қўллади. Зарур минимум эса 226 та овозга тенг.

Ўзини мустақил деб элон қилган Донецк ва Луганск халқ республикаларида қонун кескин танқид остига олинди, у Минск келишувларига зид эканлиги, ҳарбийларнинг қўлини ечиши таъкидланди. Россия ТИВ раҳбари Сергей Лавров ҳам янги қонун Минск келишувлари устидан чизиқ тортишини таъкидлаб ўтди.