Япониянинг бўлғуси императори Нарухито 58 ёшини нишонлади

2019 йилда Япония императори бўладиган валиаҳд шаҳзод Нарухито 23 февралда 58 ёшини нишонлади. У ушбу сана муносабати билан тахтга ўтириш арафасида ўз устида ишлашга ваъда берган. 

“Император ва унинг рафиқаси йўли менда чуқур ҳурмат уйғотади. Мен бундан буёғига уларнинг сиймосини қалбимда сақлаган ҳолда ҳаракат қиламан ҳамда ўз мажбуриятларимни бажариш вақтида ўз устимда ишлайман”, деб айтган Нарухито.

Нарухито амалдаги император ўзгаргандан кейинги янги давр қандай бўлиши ҳақида гапира туриб, “император ролини миллат рамзи сифатида сақлаб қолиш лозимлигини” таъкидлаб ўтган. Унинг айтишича, “императорлик оиласи жамиятдаги ўзгаришларга мос ҳолда фикрлаши ва ҳаракат қилиши лозим”.

Нарухито 1960 йилда туғилган. Нарухитонинг ота-онаси, амалдаги император Акихито ва унинг рафиқаси Митико императорлик оиласида қабул қилинган энагадан фойдаланиш анъанасидан воз кечиб, уни ўзлари тарбиялашган. Нарухито Гакусюин университетида, сўнгра Оксфорддаги Мёртон коллежида ўқиган. 1993 йилда Нарухито Япония ташқи ишлар вазирлигида ишлаган Масако Овадага уйланган. Жуфтликнинг бир қизи бор ва у ҳозир 16 ёшда.

Нарухито императорлик тахтига ўтиргач, тахтни аёл ворисларга қолдириш имконияти борасидаги баҳслар яна кескинлашиши мумкин. Ҳозирча буни қонун тақиқлайди. Бироқ бўлғуси император оиласида эркак ворислар йўқ.

2017 йил декабрда Япония ҳукумати император Акихитонинг тахтдан воз кечишининг санасини батамом тасдиқлади. Режага кўра, бу 2019 йил 30 апрелида юз беради, кейинги куни эса Нарухито тахтни эгаллайди.

Император Акихито ҳозирда 84 ёшда бўлиб, 1989 йил январидан бери император тахтини эгаллаб келади.