Шарқий Ғутада гуманитар танаффус эълон қилинди

Дамашқ яқинидаги Шарқий Ғутада 27 февралдан эътиборан гуманитар танаффус амалда бўлади. Бу ҳақда Россия Мудофаа вазири Сергей Шойгу маълум қилди.

Бу қарор БМТ Хавфсизлик кенгашининг Сурияда ўт очишни тўхтатиш ҳақидаги резолюциясидан кейин Россия президенти Владимир Путин топшириғига кўра қабул қилинди. Танаффус ҳар куни соат 09:00дан соат 14:00га қадар давом этади.

Тинч аҳоли вакиллари учун гуманитар йўлак очилади, йўлак координатлари белгилаб олинган, бу ҳақда яқин вақт ичида маълум қилинади.

Шу билан биргаликда Шойгу Шарқий Ғута ягона зиддият ўчоғи эмаслигини таъкидлаган. У АҚШ томонидан назорат қилинадиган Ат-Танфа ва Рукбандаги қочқинлар лагерларини келтириб ўтган.

«Шундай гуманитар йўлаклар Ат-Танфа ва Рукбанда ҳам ташкил этилиши таклиф қилинмоқда. Бундай йўлаклар орқали тинч аҳоли вакиллари ўз уйларига қайтишлари ва тинч ҳаёт бошлашлари мумкин бўлади», деган у.

БМТ Хавфсизлик кенгаши 24 февраль куни Сурияда 30 кунлик режимда ўт очишни тўхтатиш ҳақидаги резолюция лойиҳаси бўйича овоз берди.

Резолюция қабул қилингандан 72 соат ўтиб кучга кириши лозим бўлган ярашув режими ИШИД террорчилик гуруҳига қарши ҳарбий операцияларга тааллуқли бўлмайди.

Ҳужжат матнига, шунингдек, можаронинг барча томонлари, жумладан, Сурия ҳукуматига халқаро гуманитар ҳуқуқ меъёрларига риоя этиш талаблари киритилган.