Хоразм вилояти Хонқа туманидаги «Муҳаммад ибн Мусо ал-Хоразмий» масжидининг янгидан қурилаётган биносига Ўзбекистон мусулмонлари идораси вилоят вакиллиги ва Хоразм вилояти ҳокимлиги билан ҳамкорликда тамал тоши қўйилди. Бу ҳақда вакиллик ходими Kun.uz'га хабар берди.
Маълум қилинишича, мазкур қурилиш Ўзбекистон мусулмонлари идорасининг 2017 йил 27 июль кунги 970-сонли хатига асосан, вилоят ҳокимлиги билан мувофиқлаштирилган ҳолда бошлаб юборилди.
Масжидда қурилиш ишлари ҳомийлар ва масжид қавми томонидан амалга оширилиши кўзда тутилган.
Маълумот учун, айни кунларда Урганч шаҳридаги «Охун бобо» масжидини ҳам қайта қуриш ишлари давом этмоқда.
