Чеченистонда Ўзбекистоннинг беш фуқароси қўлга олинди

Чеченистон пойтахти Грознийда Ўзбекистоннинг беш фуқароси маҳаллий ҳуқуқни муҳофаза қилиш органлари ходимлари томонидан режали рейд тадбирлари давомида қўлга олинди. Улар расмий рўйхатдан ўтмай яшашган, бу эса Россия Федерацияси ҳудудида бўлишнинг қонунчилик билан ўрнатилган режимини бузиш саналади.

Бу ҳақда Россия суд ижрочилари федерал хизматининг Чеченистон Республикаси бўйича бошқармаси матбуот хизмати хабар бермоқда.

Суд қўлга олинган ўзбекистонликларни РФда бўлиш режимини бузганликда айбдор деб топди, уларга нисбатан 2 минг рубль миқдорида жарима тайинланди. Шунингдек, ушбу 5 шахс Россиядан чиқариб юбориладиган бўлди.

Суд ижрочилари тегишли ҳужжатлар тайёр бўлганидан сўнг қоидабузарларни Москвадаги «Внуково» аэропортига олиб боришди ҳамда «Москва-Тошкент» авиарейсига ўтказиб юборишган.