Япония икки ўзбекистонликни депортация қилди

Япония иммиграция хизматлари агентлиги 15 май куни ушбу давлатда ноқонуний равишда яшаб турган 2 нафар Ўзбекистон фуқаросини мамлакатдан чиқариб юборди. Бу ҳақда Япониянинг Ўзбекистондаги элчихонаси хабар берди.

Маълум қилинишича, ҳар икки шахс “талаба” визаси билан Японияга борган. Аммо виза муддати тугаганидан кейин ҳам мамлакатда ноқонуний равишда қолиб кетишган. Улар расмийлар томонидан ҳибсга олинган.

“Талаба” визаси пул топиш учун эмас, балки фақатгина ўқиш учун берилади. Агар ноқонуний яшаш ёки ноқонуний меҳнат қилиш ҳолатлари аниқланса, полиция томонидан ҳибсга олиш ва ушлаб туриш, иммиграция муассасаларида қамоққа олиш ёки депортация қилиш каби қатъий чоралар кўрилади”, дейилади элчихона хабарида.

Шунингдек, Япония ҳукумати қонунбузарлик қилган шахслар ҳақида маълумотни Ўзбекистон ҳукуматига ҳам тақдим этиши, шу сабабли, бундай шахсларга нисбатан Ўзбекистонга қайтганидан кейин ҳам тегишли чоралар кўрилиши мумкинлиги билдирилган.

Элчихонага кўра, Японияда қочқин мақомини олиш учун мурожаат қилинса, “узоқ муддат қолиш мумкин” ёки “ишлаш мумкин” деган нотўғри маълумот тарқалган.

“Шу каби мақсадлар билан қочқин мақомини олиш учун ариза беришга рухсат этилмайди. Агар қочқин мақоми рад этилса, иммиграция муассасасига жойлаштириш ёки депортация қилиш каби чоралар қўлланиши мумкин”, дейилади хабарда.

Сохта маълумот бериш ёки ноқонуний усуллар билан қочқин мақомини олиш учун мурожаат қилиш жиддий ҳуқуқий чораларни келтириб чиқариши мумкинлиги таъкидланган.

Элчихона “Японияда ишлаш мумкин” деган таклифларга осонгина ишонмасликни сўраган. 

Аввалроқ ҳам икки ўзбекистонлик Япониядан депортация қилинганди. Улардан бири ўқишдан четлатилганига қарамай, мамлакатда қолиб яшайверган. Иккинчиси эса, қисқа муддатли виза билан Японияга бориб, виза муддати тугаганидан кейин ҳам кунчиқар юртдан чиқиб кетмаган.