Трамп АҚШ фуқароларига Венесуэла криптовалютасига яқинлашишни тақиқлади

Фото: AFP / Federico Parra

АҚШ президенти Дональд Трамп Қўшма Штатлар фуқаролари ва юридик шахсларига Венесуэла криптовалюталари билан қандайдир амалиётлар ўтказишни тақиқловчи фармонни имзолади. Бу ҳақда Оқ уйдан хабар беришган.

Венесуэла ҳукумати томонидан 2018 йилнинг 9 январидан сўнг чиқарилган рақамли валюталар ва уларни алмаштира олувчи воситалар билан барча транзакциялар тақиқланди. Фармон АҚШ юрисдикциясидаги барча шахсларга тегишли бўлади.

Фармон 19 мартда имзоланганидан сўнг дарҳол кучга киради, дея аниқлик киритган Оқ уй. Фармон ижросини таъминлаш АҚШ Молия вазирлиги ҳамда Давлат департаментига юкланди. Санкциялар “Венесуэла президенти Николас Мадуро режимининг Қўшма Штатлар санкцияларини рақамли валюта чиқариш йўли билан четлаб ўтиш бўйича хатти-ҳаракатлари туфайли” жорий этилди.