Скрипаль Путинга хат юбориб, кечиришни сўраган - «Би-би-си»

Фото: Screenshot

Солсберида март ойи бошида заҳарланган ГРУ собиқ полковниги Сергей Скрипаль икки давлатга ишлаган агент бўлганида афсусланган, сабаби бу қарор «унинг ҳаётини заҳарлаган». Бу ҳақда «Би-би-си» Скрипалнинг мактаб давридаги дўсти Владимир Тимошковга асосан хабар бермоқда.

Хабар қилинишича, Скрипаль ўзини сотқин деб ҳисобламаган, сабаби, Тимошковнинг сўзларига кўра, «у Россияга эмас, балки Совет Иттифоқига, социалистик ватанига содиқ бўлиш ҳақида қасамёд келтирган».

Шунингдек Тимошковнинг айтишича, Скрипаль Россия президенти Владимир Путинга мактуб юбориб, унда «бутунлай кечириш» ва ватанга қайтиш имкониятини тақдим этишни сўраган. Россияда у онаси, укаси ва бошқа қариндошлари билан кўришмоқчи бўлган. «Би-би-си» маълумотларига кўра, Кремлда Скрипалдан хат олингани ҳақидаги ҳолатни тасдиқлашмаган.

Эслатиб ўтамиз, аввалроқ ЕИ етакчилари Скрипаль ишида Россиянинг қўли борлигини тан олишганди.