Иньеста «Барселона»дан кетишини эълон қилди

«Барселона» яримҳимоячиси Андрес Иньеста мавсум якунига етгач, каталонияликлар сафини тарк этади. Бу ҳақда у махсус ташкил қилинган матбуот анжуманида эълон қилди.

«Бу менинг энг сўнгги мавсумим. «Барселона»дан кетишга қарор қилганимни расман эълон қилишни истагандим. Бу ҳақида жуда узоқ ўйладим. «Барселона» мен учун – дунёнинг энг кучли клуби ва ҳамма нарса берган клуб бўлиб қолаверади», – дея гапириб ўтди Иньеста.

Иньеста «Барселона» тарбияланувчиси саналади. У жамоа сафида 2002 йилда дебют қилган бўлиб, клуб билан 8 карра Испания чемпиони, 6 карра Испания кубоги ва 7 карра Суперкубогини қўлга киритган. 4 карра Европа чемпионлар лигаси, 3 марта Европа Суперкубоги ва клублар ўртасидаги ЖЧда ғалаба қозонган. Жами бўлиб у 31та совринни қўлга киритганди.

Олдинроқ, хабар берилганидек Иньеста фаолиятини Хитойнинг «Чунцин Лифан» жамоасида давом эттиради. Шартнома уч йилга мўлжалланган бўлиши айтилмоқда.