Сан-Паулудаги ёнғинда 45 киши бедарак йўқолди

Бразилиянинг Сан-Паулу шаҳридаги баланд қаватли уйнинг ёнғин оқибатида қулашидан кейин 45 киши бедарак йўқолган деб ҳисобланмоқда. Бу ҳақда Globo телеканали маълум қилди. 

Аввалроқ бир киши ҳалок бўлгани, 3 киши бедарак йўқолгани маълум қилинганди.

“Қулаб тушган уйда яшовчи одамлар рўйхатидан келиб чиқиб, ўт ўчирувчилар 45 киши бедарак йўқолгани ҳақидаги маълумотга таяниб ишламоқдалар”, деб маълум қилган телеканал. Бу одамларнинг қаердалигини ҳозирча аниқлашнинг иложи бўлмаган ва бу уларнинг барчаси вайроналар остида қолиб кетганини ҳам англатмайди.

Бино 1 майга ўтар кечаси ёниб кетиб, кейинроқ қулаб тушган. Ёнғин қўшни бинога ҳам ўтган, бироқ ўт ўчирувчилар уни назоратга олишга муваффақ бўлишган. 

Дастлабки маълумотларга кўра, ёнғинга таом тайёрлашда спиртдан фойдаланган жуфтликнинг жанжали сабаб бўлган бўлиши мумкин. Аёл эри оловга спирт қуяётганда уни итариб юборган ва бунинг оқибатида иккисининг ҳам кийими ёниб кетган. Ёнғин сабабчилари эгнидаги ёнаётган кийимларни ечиб ташлаб, бинодан ташқарига чиқиб, омон қолишга муваффақ бўлган.