Ёқутистонда эркак 5 кишини отиб ташлади ва ўз жонига қасд қилди

Россиянинг Ёқутистонида эркак киши ов милтиғидан беш кишини отиб ташлади ва ўз жонига қасд қилди. Бу ҳолат Хангаласс улусининг Булгунняхтах қишлоғида рўй берди, деб хабар тарқатган ysia.ru.

Булгунняхтах қишлоғи раҳбари Денис Уваровнинг айтишича, ҳужум қилган шахс ўз қўшниларининг уйига бостириб кириб, тўрт нафар ёши катта инсон ва бир болани отиб ўлдирган, деб хабар қилмоқда Yakutsk.ru. Шундан сўнг эркак ўз жонига қасд қилган.

Маҳаллий фуқароларнинг сўзларига кўра, ҳужум қилган эркак қишлоққа тахминан 10 йил аввал кўчиб келган ва шу ердан уй сотиб олган. Уни одамови ва руҳий беқарор инсон сифатида баҳолашди.

«Аввал унинг томонидан ҳеч қандай тажовузкорлик юз бермаганди, бироқ у ҳар доим ғалати кўринарди. У шундай ваҳшийликка боришини ҳеч ким кутмаганди», - деган маҳаллий фуқаролардан бири.

Қайд этилишича, фожиа жойида ҳуқуқни муҳофаза қилиш органлари ишламоқда.