Жеймс Бонд ҳақидаги 25-фильмни суратга олиш декабрда бошланади

Фото: Filmpro.ru

Жеймс Бонд ҳақидаги янги, 25-фильмни суратга олиш ишлари жорий йилнинг декабрь ойида бошланади. Фильмга сценарийни "Оскар" мукофоти лауреати Жон Хож ёзиб беради. Бу ҳақда фильм ижодкорлари твиттерда хабар берган.

"Жеймс Бонд ҳақидаги 25-фильм, биз сени кутгандик. Дэниэл Крэйгнинг 007 агенти ролида бешинчи марта пайдо бўлишига Америка киносанъатлар академияси мукофоти лауреати Дэнни Бойл режиссёрлик қилади. Фильм устидаги ишлар 2018 йилнинг 3 декабрь куни бошланади", - дейилади хабарда.

Жорий йилнинг мартида Бойл кинолента устида ишни тез орада бошлашни режалаштираётгани, у йил охирига қадар катта экранларга чиқиши кераклигини маълум қилганди. Режиссёр фильмнинг дастлабки номини ҳам айтган - "Жеймс Бонд - 25".

Жеймс Бонд ҳақидаги биринчи фильм - "Доктор Ноу" (Dr. No) 1962 йилда экранларга чиққан. Энг сўнгги "бондиана" - "007: СПЕКТР" (Spectre, 2015) эса жаҳон прокатида 880 млн доллар ишлаб олди. Унга Сэм Мендес режиссёрлик қилган.