Ас-Сисий иккинчи муддатга Миср президенти лавозимини бажаришга киришди

Фото: AFP 2018 / Alain Jocard

Миср президенти этиб иккинчи муддатга сайланган Абдул Фаттоҳ ас-Сисий Қоҳирадаги Миср парламенти биносидаги тантанали маросимда янги 4 йиллик муддатга президент лавозимини бажаришга киришди.

Маросим бошида парламент спикери Миллий сайлов комиссиясининг президент сайловлари натижалари ҳақидаги резолюциясини ўқиб эшиттирди. Сайловларда Ас-Сисий катта фарқ билан ғалаба қилган.

Ўз навбатида Ас-Сисий депутатлар олдида қасамёд келтирган. Шундан кейин парламент ҳовлисида ушбу муносабат билан замбаракдан 21 та ўқ овози янграган.

Миср президенти сайловлари март ойида бўлиб ўтганди. Унда амалдаги президент Ас-Сисий 97 фоиз овоз тўплаган.

Ас-Сисий навбатдаги президентлик муддатида соғлиқни сақлаш ва таълим соҳаларига устувор эътибор беришини айтган. У биринчи президентлик муддатида бир қатор миллий лойиҳаларни амалга оширишга муваффақ бўлингани, инфратузилма яхшилангани, кўп миқдорда иш ўрни яратилганини таъкидлаб ўтган.

Ас-Сисий ташқи сиёсат мавзусига тўхталиб, Қоҳира ўз ҳамкорлари билан муносабатларни мустаҳкамлаш, ўзга можароларга аралашмаслик, давлатлар суверенитети ва ҳудудий яхлитлигини ҳурмат қилишни давом эттиришини тасдиқлаган.

Тайёрлаган: Шуҳрат Раҳимов

#Миср #Абдул Фаттоҳ ас-Сисий