Тожикистон ИИВ руминиялик сайёҳлар билан юз берган ҳодисани ўрганмоқда, улардан тожик ДАН ходимлари пул талаб қилган. Пора бериш ҳолати видеога олинган. Бу ҳақда АП хабар бермоқда.
Маълум бўлишича, руминиялик сайёҳ Михай Сика ДАН ходимларининг навбатдаги қурбонига айланди. У бу воқеа ҳақида ижтимоий тармоқларда маълумот берган.
Михай Сика ва унинг дўсти ўтган йилнинг июлида мотоциклларда Помирга сафар қилишган. 2017 йилнинг 28 июль куни, Душанбега қайтишда, Кўлобга кираверишда хорижий байкерларни ДАН йўл патрули тўхтатган.
Ҳаммаси қандай юз бергани руминиялик сайёҳ томонидан эълон қилинган видеода кўрсатилди. Унда инглиз тилини билмайдиган инспектор меҳмонлар ЙҲҚни бузганини имо-ишоралар билан кўрсатаётгани тасвирланган.
Туристнинг иддао этишича, милиционер улардан 500 сомоний талаб қилган, бироқ кейин 200га кўнган. Михай пулларни милиционер машинасининг ўриндиғига қўйган.
Видеода руминиялик сайёҳнинг ДАН ходимига пул берганини кўриш мумкин. Айни дамда ушбу ҳолат Тожикистон ИИВ томонидан суриштирувдан ўтказилмоқда. Мамлакат ИИВ баёнотига кўра, бу ходимлар ишдан бўшатилган: улар туристлар билан хушмуомала бўлишмаган, шунингдек, форма кийиш тартибини бузишган.
Ҳозирда ИИВ халқаро бўлими юқоридаги сайёҳлар билан ҳам боғланишга уринмоқда, бу улар пора ҳолати бўйича ариза ёзиши учун керак экан.
