MH17 фожиаси. Россиянинг Гаагадаги элчихонаси ёнида 298та бўш курси ўрнатилди

Россиянинг Гаагадаги элчихонаси ёнида 298та бўш курси ўрнатиб қўйилди. Бу ҳақдаги тегишли фотосурат ижтимоий тармоқларда эълон қилинди.

Қайд этилишича, шу тариқа Украина осмонида 2014 йилда уриб туширилган «Боинг» йўловчилари яқинлари ўзларининг норозиликларини билдиришган.

Жорий йилнинг 25 май куни Нидерландия ва Австралия ҳукумати Россияни Малайзиянинг Boeing MH17 лайнери ҳалокатида расман айблаганди. Таъкидланишича, Россия самолётнинг қулашига алоқадор эканини рад этиб келаётган бўлса-да, Нидерландия ва Австралия ҳукумати айнан Россия рўй берган ҳалокатга масъул эканига ишончи комил.

Россия президенти матбуот котиби Дмитрий Песков эса, Владимир Путин халқаро тергов гуруҳининг Малайзия Boeing’и ҳалокати бўйича хулосаларини ҳали ўрганиб чиқмаганини айтганди.

Шунингдек, ЕХҲТнинг махсус мониторинг миссияси иштирокчилари 2014 йил июль ойида Донецк узра осмонда уриб туширилган Малайзиянинг Boeing 777 ҳалокатини суриштирувдан ўтказиш жараёнида иштирок этишмаётгани хабар қилинди.

Нидерландия Украина ва «Малайзия авиайўналишлари»ни MH17 учун жавобгарликка тортишдан бош тортганди.