Актриса ва БМТнинг қочқинлар иши бўйича Олий комиссарият бошқармасининг кўнгилли элчиси Анжелина Жоли суриялик қочқинларни ўз ҳудудига қабул қилгани учун Ироқ ҳукуматига миннатдорчилик билдирди. БМТнинг қочқинлар иши бўйича Олий комиссарияти бошқармаси сайтида шу ҳақида хабар берилди.
Жоли қочқинларга молиявий ёрдам етишмаслигининг оғир асоратлари ҳақида сўз юритган. Унинг сўзларига кўра, Суриядаги одамларни ўз уйларини тарк этишга мажбур қилувчи низоларга чек қўйиш зарур.
Актриса шунингдек "Ироқ ҳукуматининг Сурия Араб Республикаси қочқинларига нисбатан бағрикенглигини" алоҳида таъкидлаган.
Гап шундаки, 16 июнь куни Анжелина Жоли ИШИДнинг собиқ пойтахти ҳисобланган Ироқнинг Мўсул шаҳрига ташриф буюрган.
Жоли шаҳарнинг ғарбий туманларида бўлиб, БМТ қўмитаси ёрдам бериб келувчи маҳаллий аҳоли вакиллари билан мулоқот қилган.
Анжелина БМТдаги фаолиятини бошлагандан бери Мўсулдаги каби бўшлиқни кўрмаганлигини айтди. Шунингдек у 2014 йилда ИШИД ўз "халифалигини" эълон қилган Ан-Нурий масжиди вайроналарини бориб кўрди.
