Улуғбек Иноятов Самарқанддаги тадбирда иштирок этаётган вақтда ишдан олинди

Бугун, 20 июнь куни Ўзбекистон Республикаси Халқ таълими вазири Улуғбек Иноятов уч нафар ўринбосари билан бирга ишдан олинди.

Улуғбек Иноятов мазкур лавозимда 2013 йилдан буён ишлаб келаётганди. У 2017 йил февралида Шахмат федерациясига ҳам раҳбар бўлганди.

Қизиғи шундаки, ишдан бўшатилгани эълон қилинган вақтда вазир Самарқанд шаҳрида бошланган умумтаълим мактаби ўқувчилари ўртасида физика ва астрономия фанларидан Мирзо Улуғбек номидаги халқаро олимпиаданинг очилиш маросимида иштирок этаётганди. У Халқ таълими вазири сифатида тадбирда сўзга чиқди.

Айни вақтда собиқ вазир ва унинг ўринбосарларининг кейинги фаолияти ҳақида маълумотлар йўқ.

Бугундан Самарқанд шаҳрида илк маротаба умумий ўрта таълим мактабларининг физика ва астрономия фанларидан Мирзо Улуғбек номидаги халқаро олимпиада бошланди. Унда Туркманистон, Қозоғистон ва Қирғизистон вакиллари ҳам иштирок этмоқда.