Европа иттифоқи етакчилари миграция инқирозини ҳал қилиш бўйича келиша олишмади

Умумевропа саммити арафасида Европа иттифоқининг 16 та давлати Брюсселда миграция инқирози бўйича шошилинч йиғилиш ўказишни бошлашди. 

Европа иттифоқи етакчилари миграция инқирози масаласи бўйича ягона позицияга келиша олишмаган, деб хабар берди Bloomberg. Европа иттифоқи давлатларининг бир қисми музокараларда иштирок этишдан бош тортгач, буни Германия канцлери Ангела Меркель ҳам очиқчасига тан олган.  

“Афсуски, миграция инқирози бўйича ЕИ саммитида умумий қарорга эриша олмаслигимизни биламиз. Шу сабабли бизга икки томонлама ёки уч томонлама келишувлар зарур”, деб айтган Меркель.

Брюссселдаги норамий саммитга ЕИнинг 28 та давлатидан 16 та давлати етакчиларигина келган. Le Monde нашрининг маълум қилишича, музокараларда иштирок этишдан Венгрия, Польша, Чехия ва Словакия етакчилари бош тортган.

Италия муҳожирларни ЕИнинг барча давлатлари ўртасида тақсимлашни ва муҳожирларни қабул қилаётган давлатларга кенгайтирилган ёрдам кўрсатилишини талаб қилмоқда, бироқ Венгрия, Польша, Чехия ва Словакия қочқинларни қабул қилишдан бош тортмоқда.