Роналдунинг келажаги бугун ҳал бўлиши мумкин

«Реал» ҳужумчиси Криштиану Роналдунинг агенти Жорже Мендеш бугун Қироллик клуби раҳбарияти билан учрашиб, ўз мижозининг келажаги масаласини муҳокама қилади. Бу ҳақда Sky Italia хабар бермоқда.

Манба маълумотига кўра, Мендеш клуб раҳбариятига 33 ёшли ушбу футболчи учун берилган 100 миллион евролик таклифни расман тақдим этган. Агар учрашув муваффақиятли кечса, Роналдунинг тақдири 48 соат ичида ҳал бўлади.

Роналдунинг кейинги клуби катта эҳтимол билан «Ювентус» бўлади.

Ушбу клуб португалиялик юлдуз билан 4 йиллик шартнома бўйича оғзаки келишувга эришган. Унга кўра футболчи йилига 30 миллион евро маош олади.

La Gazzetta dello Sport маълумотига кўра, Роналду «Ювентус» бош мураббийи Аллегри билан ўтган жума куни телефон орқали мулоқот қилган, ўшанда мураббий Туринга келиб «Ювентус» президенти Андре Аньелли билан трансферлар масаласида гаплашиб олганди.

«Реал»нинг янги бош мураббийи Хулен Лопетеги Роналдуни қолишга кўндиролмаган. Chiringuito de Jugones маълумотига кўра, Лопетеги португалиялик футболчига қўнғироқ қилган, аммо футболчи ўз сабабларини келтириб, кетишини маълум қилган.

Италия матбуоти тахминига кўра, айни вақтда «Ювентус» президенти Андреа Аньелли Пиза аэропортидан хусусий самолётда Грециянинг Каламата шаҳрига йўл олди. У шу шаҳар яқинидаги Пилос курортида таътилни ўтказаётган Роналду билан учрашиб, уни Турин клубига ўтишга кўндирмоқчи.