Европа Иттифоқи ва Япония ўртасида эркин савдо тўғрисидаги битим имзоланди

Бугун, 17 июль куни Япония бош вазири Синдзо Абе ва Европа Иттифоқи етакчилари ўзаро савдодаги аксарият маҳсулотларга бож тарифларини бекор қилишни кўз тутувчи эркин савдо тўғрисидаги келишувга эришди. Бу ҳақда Xinhua агентлиги хабар бермоқда.

Синдзо Абе Европа Комиссияси раиси Жан-Клод Юнкер ва Европа Кенгаши раиси Дональд Туск билан учрашув чоғида эркин савдонинг протектионизмдан афзаллик жиҳатлари ҳақида тўхталди ҳамда эришилган келишувни «муҳим аҳамиятга эга» ва «тарихий муваффақият» дея баҳолади.

Европа Комиссияси бош спикери Маргарит Шинас Япония ва ЕИ ўртасидаги савдо ҳамкорлиги масалаларини муҳокама қилиш жараёнини «Европа Иттифоқи тарихидаги энг йирик музокаралар» деб атаган. Унинг қўшимча қилишича, «ушбу келишув натижасида жаҳон ЯИМнинг учдан бир қисмини қамраб олувчи эркин савдо ҳудуди яратилади»

Евроиттифоқнинг савдо комиссари Сесилия Мальмстрёмнинг фикрича, ЕИ – Япония ҳамкорлигини жаҳон ҳамжамияти АҚШнинг протектионист раҳбариятига қарши ўзига хос сигнал сифатида қабул қилиши керак.

Савдо шартномасига кўра, Европа Япония автосаноати учун ўз эшикларини очади, ўз навбатида, кунчиқар мамлакат ЕИнинг қишлоқ хўжалиги, айниқса сут маҳсулотлари импорти учун барча тўсиқларни олиб ташлайди.

2019 йил мартигача кучга кирадиган эркин савдо тўғрисидаги пактга биноан, Япония ЕИдан умумий импорт божларининг 94 фоизини бекор қилади. Ўз навбатида, Европа томони Япония импорт маҳсулотлари учун бож тўловларини 99 фоизга қисқартиради.

Ушбу келишув натижасида Евроиттифоқ жаҳоннинг энг бой бозорларидан бирига кириш имконига эга бўлса, Япония ўз иқтисодига катта туртки бўлишидан умид қилмоқда.

Томонлар, шунингдек, хавфсизлик, кибержиноятчилик ва иқлим ўзгариши каби турли масалаларни қамраб олган стратегик ҳамкорлик тўғрисидаги шартномани ҳам имзолашди.

Япония бош вазири Синдзо Абе ушбу шартномани имзолаш учун ўтган ҳафта Брюсселга ташриф буюриши режалаштирилган, бироқ 220 кишини ҳаётдан олиб кетган сув тошқинлари сабаб ўз ташрифини бекор қилишига тўғри келганди.

Жаҳоннинг энг йирик яхлит бозори – 28 мамлакатдаги 500 миллион аҳолини ўз ичига олган Европа Иттифоқи Трампнинг протектионизм сиёсатидан буткул тескари йўлдан бормоқда. Хусусан, иттифоқ ва Япониянинг бугун имзолаган шартномаси АҚШнинг пўлат ва алюминийга бож жорий қилишига қарши «қўшма фронт» тузилганидан дарак беради. Аввалроқ расмий Токио қўшма штатлар томонидан савдо уруши бошланишини «ачинарли ҳолат» дея баҳолаганди.

Европа Иттифоқи раҳбариятидан иборат делегация бугун Токиога ташриф буюришидан олдин кеча Хитой пойтахти Пекинда ҳам бўлиб, жаҳон ҳамжамиятини тижорат бўйича халқаро ҳамкорликни ривожлантиришга ва савдо урушларидан тийилишга чақирганди.