«Ҳаққингизни талаб қилинг». Ҳоким қарорини бекор қилдирган тадбиркор воқеаси

Ҳуқуқшунос Хушнудбек Худайбердиев телеграмдаги Xushnudbek.uz каналида Наманганда хусусий тадбиркор ва шаҳар ҳокими ўртасида кечган суд иши ҳақида ҳикоя қилади. Унга кўра, тадбиркор ўз ҳуқуқлари тикланиши учун охиригача ҳаракат қилиб, мақсадига эришгани келтирилган.

Кеча қизиқ маълумот эшитиб қолдим. Бироз эскироғу, лекин моҳияти эскирмаган.

Хуллас, Наманган шаҳар ҳокими 2017 йил 27 март куни 345-сон қарор чиқаради. Қарорда Наманган шаҳридаги ресторан, бар, кўнгилочар тадбирлар ўтказувчи шохобчалар, умумий овқатланиш ҳамда чакана савдо объектларининг иш вақти соат 22:00гача деб белгиланади. Шундан сўнг Наманган шаҳрида тинимсиз «рейд»лар ўтказилади, соат 22:00дан кейин очиқ бўлган жойлар мажбуран ёптирилади, эгаларига эса чоралар кўриш бошланади.

Хавфсизлик ниқоби остида қабул қилинган бу қарор охири бир тадбиркорнинг жонига тегади. Чунки якка тартибдаги тадбиркор У.Ш. кундузи соат 15:00дан тонгги соат 07:00гача ишлайдиган тамаддихона очган эди. Лекин шаҳар ҳокимининг қарори унинг ишига халақит бераверади, даромади кескин камаяди, кредитларини қайтара олмай қолади, ишчилари камайиб кетади.

Кунларнинг бирида тадбиркор Адлия вазири ўринбосарининг сайёр қабули бўлаётган пайтда шундай талаб қўяди: ёки менга қайси қонунда соат 22:00дан кейин ошхонамни ёпишим кераклиги ёзилганини топиб берасизлар, ёки менинг ҳуқуқларимни ҳимоя қиласизлар!

Албатта, адлия органлари қонуний асосни топа олишмасди, шу сабабли тадбиркорнинг манфаатларини кўзлаб Наманган шаҳар ҳокимини судга беради. Аниқроғи ҳоким қарорини «ғайриқонуний» деб топишни сўрашади.

Судга бир неча марта чақиришларига қарамасдан, шаҳар ҳокимлигидан ҳеч ким келмайди.

Суд қараб ўтирармиди, шартта сиртдан қарор қабул қилади. Наманган шаҳар маъмурий судининг 2017 йил 7 июлдаги ҳал қилув қарорига биноан, Наманган шаҳар ҳокимининг 2017 йил 27 мартдаги 345-сон қарори «ғайриқонуний» деб топилади. Тадбиркорлар эса яна эркин нафас ола бошлашади.

Қиссадан ҳисса шуки, ҳокимнинг қарори экан, деб нима бўлса хўп деб кетаверманг. Ҳаққингизни талаб қилинг, судга беринг, шикоят қилинг. Шунда нафақат ўзингизнинг, балки наманганлик тадбиркор У.Ш. каби кўпчиликнинг жонига оро кирган бўлар эдингиз.