Мисрда 39 нафар экстремист умрбод қамоқ жазосига маҳкум қилинди

Мисрнинг Асйут вилояти суди мамлакатда тақиқланган «Мусулмон биродарлар» ҳаракатининг 39 аъзосини умрбод қамоқ жазосига маҳкум қилди. Улар Муҳаммад Мурсий ҳокимиятдан четлатилганидан сўнг, одамларни зўравонлик тадбирларида иштирок этишга даъват қилганликда айбдор деб топилишди, деб хабар беради «Йавм7» портали.

Айни пайтда «Мусулмон биродарлар» гуруҳининг деярли барча етакчилари қамоққа олинган. Улар давлат устунларини йўқ қилишга уриниш ва Қоҳиранинг Робиа ал-Адавия даҳасидаги намойишчилар тарқатиб юборилгач, мамлакатда тартибсизликларни вужудга келтиришга уринишда айбдор деб топилганлар.  

Эслатиб ўтамиз, 2013 йили президент Муҳаммад Мурсий ҳокимиятдан четлатилгач, «Мусулмон биродарлар» ҳаракати Робиа ал-Адавия майдонида кўп кунлик намойиш уюштирганди. Шундан сўнг, Миср хавфсизлик кучлари барча намойишчиларни куч ишлатиб, тарқатиб юборганди.