Қотил ошпаз, пичоқланган 5 ака-ука ва умрбод қамоқ – Косондаги мудҳиш қотиллик

2025 йил 2 июл. Қарши шаҳридаги чойхонада ошпаз бўлиб ишловчи Қувонч Суннатовнинг телефонига SMS келди. У хабарни ўқиди ва ўзи ишлатадиган пичоқни рюкзагига солиб, йўлга чиқди. Орадан 3 соат ўтиб, Косон тумани Мустақиллик маҳалласида даҳшатли ошкора қотиллик содир бўлди: Қувонч Суннатов 5 ака-укани яқинлари кўз олдида пичоқлади. Оқибатда икки ака-ука ҳалок бўлди, учтаси жароҳатланди. Ҳодисадан хабар топганларни бир савол ўйлантирарди: ошпаз нега қотилликка қўл урди, унинг телефонига кимдан қандай SMS келганди?

Баъзида кичик оилавий жанжаллар катта жиноятларга сабаб бўлади. Қашқадарё вилоятининг Косон туманида содир этилган даҳшатли қотиллик ҳам оилавий жанжалга бориб тақалади. Афсуски, орадан 8 ой ўтганига қарамай бу воқеа ҳамон косонликларни ҳайратга, марҳумларнинг яқинларини эса изтиробга солиб келмоқда.

Сангамдан келган SMS

2023 йилнинг декабри. Косон туманида яшовчи Сангам Мусаев Севинч Суннатова билан турмуш қуради. Бироқ уларнинг биргаликдаги турмуши тинч кечмайди, эр-хотин ўртасида турли оилавий жанжаллар бўлиб туради. Шундай жанжалларнинг бирида, 2025 йилнинг 11 июн куни Сангам Мусаевнинг акаси Ғолиб Мусаев Севинчни ота-онасининг уйига ташлаб кетади.

30 ёшли Қувонч Суннатов Севинчнинг акаси эди. У Қарши шаҳридаги чойхоналардан бирида ошпаз бўлиб ишларди. Куёви синглисини жўнатиб юборгани уни ғазаблантирмасдан қолмаганди.

2025 йил 2 июл. Одатдагидай кунларнинг бири. Қувонч чойхонада ўз ишлари билан банд эди. Соат 14:00 ларда унинг телефонига куёви Сангам Мусаевдан “Синглингнинг нарсаларини чиқариб қўйибман, келиб олиб кетинглар”, деган хабар келади. Ошпаз унга жавобан хўп деган мазмунда хабар жўнатади. Ўша кунги воқеаларнинг бари ана шу хабардан бошланганди.

Хавфли рюкзак

Қувонч Суннатов куёвидан SMS олгач, онасига қўнғироқ қилади. “Куёвингиз нарсаларни олиб кетинглар, деб ёзиб юборди”, дейди у. Шунда онаси “Ажрашиб кетадими, яшайдими?” деб сўрайди. Онасининг ҳадик аралаш берган саволига Қувонч “Қачондир вақти келиб яшаб кетар, бориб нарсаларини олиб келамиз, олиб кет деганидан кейин ялиниб яшатиб бўлмайди, такси гаплашиб келинглар, мен ҳам бораман”, дея жавоб қайтаради.

Шундан сўнг Қувонч синглисига тегишли буюмларни олиб келиш учун 400 минг сўмга юк машинаси гаплашади ҳам унинг ҳайдовчисига манзилни тушунтиради.

Синглиси бир нафар вояга етмаган фарзанди ҳамда 7 ойлик ҳомиласи билан ажрашиб кетаётгани акани тинч қўймасди. У бунга куёви ва унинг оила аъзолари сабабчи экани ҳақида ўйлаб, ғазаб отига минганди. Шу сабабли синглисининг ор-номуси учун қасд олиш мақсадида чойхонадан ўзи ишлатиб келган пичоқни рюкзагига солиб, йўловчи машинада Косон туманига йўл олади.

Ошкора қотиллик

Қувонч Суннатов Косон тумани Бешқўтон маҳалласида яшовчи тоғасининг яшаш уйига келиб, бувиси билан суҳбатлашади. Шу пайт поччаси бошқарувидаги машинада онаси, синглиси ҳамда укаси ҳам етиб келади.

Қувонч Суннатов синглисига қарата “Борадиган бўлсанг бақир-чақир қилмасдан нарсаларингни йиғиштириб қайтасан”, дейди. Сўнгра юкларни ортишда ёрдамлашишини айтиб, жиянини ҳам ўзлари билан олган ҳолда Сангам Мусаевнинг уйига боришади.

Севинчнинг буюмлари ҳовлига кирган жойда йиғиб қўйилганди. Бу ерда қуда томонни Сангам, унинг акалари Ғолиб, Камол, Лочинбек ва Фарҳод Мусаевлар кутиб турганди. Аслида қудалар бир-бирлари билан қариндош бўлган.

Қувонч куёви яшаган ҳовлига кириб бораркан, ака-укалар билан кўришмайди. Фақат аммаси билан оғзаки сўрашиб қўяди. Сўнгра дарвозани очиб, юк машинасига синглисининг буюмларини юклай бошлайди. Бу пайтда ўзи билан бирга келган онаси қуда томон билан тортишиб турганди. Қувонч онасига қарата жим бўлишни, улар билан ўзи гаплашишини айтади.

Юклар машинага ортиб бўлинганда Севинч турмуш ўртоғи Сангамга “Икки ёш боланинг уволи уради сени”, дейди. Сангам эса Севинчни урмоқчи бўлади ва қуда томонни онасидан келиб ҳақоратлайди. Бу ҳолат Қувончнинг жаҳлини баттар чиқаради. У поччасининг машинасига қўйган рюкзагини олади. Бир кўнгилсизликни сезган онаси, синглиси ва жияни уни тўхтатиб, машинага ўтирғизади.

Аммо Қувонч Суннатов секин ҳаракатланаётган машинадан тушиб, қўлида тахта бўлагини кўтариб келаётган Ғолиб Мусаевнинг қорин ва кўкрак соҳасига икки марта пичоқ уради. Сўнгра уларни ажратиш учун келган Фарҳод Мусаевга ҳам икки марта пичоқ уради. Шундан сўнг кўзи қонга тўлган ошпаз Комил Мусаевни қувлашга тушади. Уни картошка экилган ер майдонида ушлаб олиб, унгаям пичоқ билан икки марта зарба беради.

Шунингдек, Қувонч Суннатов Лочинбек Мусаев ҳамда куёви Сангам Мусаевга ҳам пичоқ санчиб, уларни ўлдиришга суиқасд қилган.

Шу тариқа, яқин қариндошлари кўз ўнгида пичоқланган Камол Мусаев воқеа жойида, Ғолиб Мусаев эса шифохонада вафот этган. Қолган уч ака-ука эса тан жароҳати олган.

Бўлаётган жанжални кўриб, ҳомиладор Севинчнинг мазаси бўлмай қолган. Қувонч синглисини онаси ва укаси билан биргаликда поччасининг машинасида Қарши шаҳар тез тиббий ёрдам бўлимига олиб кетган. Шифокорлар унинг кийимларига сачраган қон доғларини кўрган. Шу сабабли Қувонч Сатторов поччаси билан ўзи ишлайдиган чойхонага бориб, кийимларини алмаштирган. Сўнгра шифохонага бориб, онаси ва синглисини шифохонадан олиб чиқиб кетаётганда тезкор ходимлар томонидан қўлга олинган.

“Ҳаммасини ўлдир, деди”

Барча жиноят ишларида қарама-қарши кўрсатмалар бўлгани каби, бу қотиллик судида ҳам томонлар жанжалнинг келиб чиқиш сабаблари, ким аввал нима дегани-ю, ким қандай ҳаракат қилгани борасида турлича кўрсатмалар берган. Албатта, уларнинг барини санаб ўтириш фикридан йироқмиз. Аммо судда жабрланувчи томон кўрсатмасида Қувонч Суннатовнинг онаси билан боғлиқ бир гап янграган.

Жумладан, жабрланувчи Фарҳод Мусаев ўз кўрсатмасида секин юриб кетаётган машинадан Қувонч ва унинг онаси тушганини, онаси ўғлига қараб “ҳаммасини ўлдир”, дея қўли билан улар томонга ишора қилганини айтган. Шунингдек, у ўзига пичоқни Қувонч эмас, укаси Қодир санчганини билдирган.

“Қувонч сумкасидан ошхона пичоғини олиб, югуриб келганича укам Комилнинг қорнига икки марта урди. Шунда ҳолатни кўриб турган укам Ғолиб уларни ажратиш учун югурди. Қувонч пичоқ билан Ғолибнинг биқинига урди, сўнгра Лочинбекка ташланди. Лочинбек чап бергани сабабли пичоқ унинг қўлтиқ соҳасидан ўтиб кетди. Шунда югуриб бориб, Қувончнинг иккала қўлини ушладим. У укаси Қодирга пичоқни ол, деб айтди. Қодир келиб пичоқни олди. Қувонч укасига қараб “ур”, деди. Қодир пичоқни қўлтиқ ости соҳамга тиқиб, кўтариб юборди. Шунда танамдан “пуфф” этган овоз чиқиб, тирқираб қон оқа бошлади. Укам Ғолиб Қодирни кийимидан ушлаб тортганида у бурилиб, укамнинг ҳам олд кўкрак соҳасига бир марта пичоқ санчиб олди. Биз Қодирнинг қўлини ушлаганимизда укам Ғолиб пичоқни олиб, дарвозахонага отиб юборди. Сўнгра Қувонч ва унинг оила аъзолари ҳодиса жойидан машинада қочиб кетишди”, деган Фарҳод Мусаев ўз кўрсатмасида.

У Қувонч Суннатов билан бирга унинг вояга етмаган укаси Қодир Суннатовни ҳам жавобгарликка тортишни сўраган.

Судланувчи Қувонч Суннатов судда айбига тўлиқ иқрор бўлган ва пушаймонлик билдирган. У ўз кўрсатмасида онаси “ҳаммасини ўлдир”, дея айтмаганини, аксинча жанжални тўхтатишга уринганини, укаси Қодир, поччаси ва жияни аралашмаганини маълум қилган. Бундан ташқари, судда гувоҳ сифатида сўралганлар ҳам Қодирнинг қўлида пичоқ кўрмаганини билдиришган.

Жазо

ЖИБ Косон туман судининг 2025 йил 23 декабрдаги ҳукми билан 29 ёшли Қувонч Суннатов Жиноят кодекси 97-моддаси (қасддан одам ўлдириш) 2-қисми “а,г,ж” бандлари ва 25,97-моддаси 2-қисми “а,г,ж” бандларида назарда тутилган жиноятларни содир қилганликда айбли деб топилган. Унга умрбод озодликдан маҳрум қилиш жазоси тайинланган. Жазони махсус тартибли колонияларда ўташ белгиланган.

Қашқадарё вилояти суди жиноят ишлари бўйича судлов ҳайъати апелляция инстанциясининг 2026 йил 24 февралдаги ажрими билан дастлабки суд ҳукми ўзгаришсиз қолдирилган.

Олий суд ахборот хизмати билан ҳамкорликда суд ҳужжатлари асосида тайёрланди.