Apple смартфон етказиш кўрсаткичлари бўйича пастлади, ким биринчи?

Хитойнинг Huawei компанияси саккиз йил деганда биринчи марта Apple'ни учинчи ўринга суриб, жаҳон миқёсида смартфонларни етказиб бериш бўйича иккинчи ўринни эгаллади. IDC тадқиқот компаниясининг ҳисоботида шу ҳақида маълум қилинди. 

2018 йилнинг иккинчи чораги якунларига кўра, смартфонлар ишлаб чиқарувчилари бутун дунё бўйлаб харидорларга 342 миллион қурилма йўллашган. Таъкидлаш жоизки, бир йил аввал бу кўрсаткич 348,2 миллионтани ташкил қилган эди.

Смартфонларни етказиб бериш бўйича етакчилар учлигидан Samsung, Huawei ва Apple компаниялари ўрин олди. Samsung 2017 йилнинг иккинчи чорагига нисбатан 10,4 фоиз кам смартфон етказган бўлса-да, биринчи ўринда қолди. 

Huawei эса иккинчи ўринни эгаллаб, Apple компаниясини ортда қолдирди. Apple йилдан йилга ўз кўрсаткичларини 0,7 фоизга ошириб, учинчи ўринга тушди. Ҳисобот даврида Америка компанияси смартфонлар бозорининг 12,1 фоизини эгаллади. 

Етакчилик бешлигидан шунингдек смартфонлар бозорининг 10 фоиздан камроғини эгаллаган Xiaomi ва Oppo компаниялари ҳам жой олган.