Дарёда чўмилаётган ўсмирни тимсоҳ ғажиб ташлади

Зимбабведа тимсоҳ дарёда чўмилаётган ўсмирни ғажиб ташлади. Бу ҳақда маҳаллий The Herald нашри хабар берди.

Воқеа Мидлендс вилоятидаги Торвуд қишлоғида содир бўлди. Тимсоҳ ҳужум қилган пайтда 14 ёшли Али Фири Квекве дарёсида уч дўсти билан чўмилаётган бўлган. Дўстларидан бири унга ёрдам беришга шошилган, қолган иккитаси эса одамларни ёрдамга чақиргани чопишган. Ёрдамга етиб келган катталар Фирини тимсоҳ оғзидан тортиб олиш учун дарёга ўзларини отишган, аммо кеч бўлганди. 

Тахминларга кўра, Квекве дарёсида олтита тимсоҳ яшайди, улар кейинги йилларда камида олти кишининг умрига зомин бўлган.