“Толибон” Афғонистон бўйича Москвадаги музокараларда иштирок этадиган бўлди

“Толибон” Афғонистон бўйича Москвадаги музокараларда иштирок этиш таклифини қабул қилди. Учрашув 4 сентябрда бўлиб ўтиши режалаштирилган. Бу ҳақда “Толибон” вакилига иқтибос келтирган ҳолда Reuters ахборот агентлиги маълум қилди. 

“Етакчиларимиз Россияда ташкил қилинадиган музокараларда иштирок этиш таклифини қабул қилишди”, деб айтган толиблар вакили.

Маълум қилинишича, музокараларга “Толибон”нинг камида 4 нафар юқори лавозимли қўмондони ташриф буюриши мумкин.

Аввалроқ Афғонистон ташқи ишлар вазирлиги Кобул Москвадаги учрашувда иштирок этмаслигини маълум қилганди.

Россия ташқи ишлар вазирлиги Афғонистон бўйича Москва форматидаги маслаҳатлашувларга 12 та давлат, жумладан АҚШ таклиф қилинганини маълум қилган. Бундан ташқари, йиғилишга “Толибон”нинг Доҳадаги сиёсий идораси раҳбарияти таклиф қилинган.