Бразилиянинг энг қадимий музейи ёниб кетди

Рио-де-Жанейрода Бразилиядаги энг қадимий музей – Бразилия миллий музейи ёниб кетди. Ҳеч ким жабрланмаган, бироқ музейдаги коллекциянинг катта қисми йўқотилган. Музей 200 йиллик тарихга эга бўлиб, унда бир вақтлар қирол ва икки император қароргоҳи бўлган.

Ёнғин 2 сентябрь соат 19:30 да бошланган. Музей бу вақтда ёпиқ бўлган ва шу сабабли жабрланувчилар бўлмаган. 

Ёнғин қисқа вақт ичида XIX бошида қурилган иншоот бўйлаб тарқалган. Олов кўплаб экспонатларни сақлаш учун осон алангаланувчи кимёвий моддалар қўллангани сабабли тез тарқалган.

Ёнғин оқибатида 20 млндан кўпроқ экспонат ва 200 йиллик тадқиқот ва илмий ишлар йўқ бўлган. Умумий ҳисобда 20 минг квадрат метрдаги экспозициялар ёниб кетган.

Жумладан, ҳайвонлар, ҳашаротлар, минераллар, ҳиндулар идиш-товоқлари, Миср ва Жанубий Америка мумиёлари, археологик асори-атиқалар, метеоритлар коллекцияси йўқотилган.

Бразилия президенти Мишел Темер твиттерда “етказилган зиённи баҳолашнинг имкони йўқлигини” ёзган. “200 йиллик иш йўқотилди. Бу кун барча бразилияликлар учун қайғули кундир”, деб ёзган Темер.   

Таъкидланишича, полиция ёнғин сабабини ўрнатиш билан шуғулланмоқда. Дастлабки тахминларга кўра, ёнғин музейнинг ертўласида бошланган.

1818 йилда Португалия қироли Жуан VI томонидан ташкил этилган музей 2018 йил июнда 200 йиллигини нишонлаган.