Мексикада халқаро жиноий гуруҳ етакчиси қўлга олинди

Мексиканинг Жиноий терговлар агентлиги ходимлари мамлакат ҳудудида “Лос-Масос” халқаро жиноий гуруҳи етакчиси ҳисобланган ва Интерпол линияси бўйича қидирувда бўлган Донован Агуайо Ромерони қўлга олишди. Бу ҳақда Мексика бош прокуратураси маълум қилди.

Ромеро Текамак муниципалитетида қўлга олинган. У босқинчиликлар содир этиш ва соғлиққа жиддий зиён етказиш жиноятларини содир этишда айбланмоқда.

Milenio нашрининг маълум қилишича, 2010 йилда тузилган “Лос-Масос” тўдаси заргарлик дўконларига ҳужум қилиш билан шуғулланган. Тўда аъзолари Мексикадан ташқари бошқа давлатлар, жумладан Канада, Коста-Рика, АҚШ, Уругвай ва Францияда жиноятлар содир этган.