Жек Ма Alibaba’дан кетиши борасидаги мавҳумликка «нуқта қўйди»

Хитойдаги энг йирик электрон тижорат корпорацияси Alibaba Group асосчиси ва раҳбари Жек Ма 2019 йил 10 сентябрда компания раҳбарини лавозимини тарк этади, унинг ўрнини эса ҳозирги бош директор Чжан Юн эгаллайди. Бу ҳақда Alibaba Group баёнотида маълум қилинган. 

“Бугун Alibaba’нинг 19 йиллиги. Мен роппа-роса бир йилдан кейин, яъни 2019 йил 10 сентябрда, компаниянинг 20 йиллиги кунида Alibaba Group бошқарув кенгаши раиси вазифасини бошқа бажармаслигимни эълон қиламан”, деб айтилган баёнотда.

“Бугунги кундан бошлаб мен компаниямизни бу ўзгаришларга тайёрлашда Чжан Юнга бутун кучим билан ёрдам беришни бошлайман”, деб айтган хитойлик миллиардер.

Ма 2019 йил 10 сентябрдан кейин 2020 йилда компания акциядорларининг йиллик кенгаши ўтказилгунгача компаниянинг директорлар кенгаши аъзоси бўлиб қолади.

8 сентябрда The New York Times нашри Манинг сўзларига иқтибос келтирган ҳолда у жорий йилнинг 10 сентябрида компания раҳбари лавозимидан кетишини маълум қилган. Нашр маълумотларига кўра, 10 сентябрда 54 ёшга тўладиган Ма хайрия ишлари ва таълим лойиҳалари билан шуғулланиш учун пенсияга кетишини айтган. Бироқ кейинроқ Alibaba вакилларидан бири бу хабарни инкор этган.