Филиппинда «Мангхут» тўфони сабабли 800 мингдан кўпроқ киши эвакуация қилинади

Филиппиннинг бир нечта вилоятида борган сари кучаяётган “Мангхут” тўфони сабабли 800 мингдан кўпроқ киши эвакуация қилинади. Бу ҳақда “Синьхуа” ахборот агентлиги хабар бермоқда.   

Филиппиннинг фалокатлар хавфини камайтириш миллий кенгаши (NDRRMC) вакили Эдгар Посадаснинг айтишича, айни вақтда табиий офат авжга чиқадиган ҳудудларда эвакуация ўтказилмоқда.  

Маълум қилинишича, гап Кагаян, Исабела, Апаяо, Абра, Ифугао, Жанубий Илокос, Шимолий Илокос ва Тоғли вилоятларидаги 824 мингга яқин кишини эвакуация қилиш ҳақида бормоқда.

Ҳукумат тўфон жиддий вайронгарчиликларга сабаб бўлиши ва тошқин ҳамда кўчкилар келтириб чиқариши мумкинлигини таъкидлаган ҳолда у ёпириладиган ҳудудларда бўлганларни эвакуация марказларида яширинишга чақирган.

“Мангхут” Филиппинга 12 сентябрда яқинлашган. У 15 сентябрда максимал кучайиши кутилмоқда. “Мангхут” шамолининг максимал тезлиги соатига 270 кмни ташкил қилиб, супертўфон сифатида таснифланган.