Филиппинда кучли зилзила: камида 32 киши ҳалок бўлди

8 июнь куни Филиппин жанубидаги Минданао ороли қирғоқларида юз берган 7,8 магнитудали зилзила содир бўлди. Зилзила маҳаллий вақт билан соат 07:37да содир бўлган. Дастлабки зилзиладан кейин 1 дан 6,7 балгача гача бўлган 130 дан ортиқ афтершоклар қайд этилди.

Қирғоқбўйи ҳудудларида зилзила электр ва алоқа тармоқларини вақтинча ишдан чиқарди, бироқ кейинчалик улар қайта тикланди. Зилзила эпицентри яқинида жойлашган Генерал-Сантос шаҳри Филиппиннинг «тунес пойтахти» сифатида танилган.

BBC’нинг маҳаллий расмийларга таяниб ёзишича, зилзила оқибатида камида 19 киши ҳалок бўлди. Бир нечта вилоятда — Жанубий Котабато, Султон Қударат, Сарангани — ва Генерал-Сантос шаҳрида камида 134 киши жароҳатланган. Бу рақамлар ҳали табиий офатлар оқибатларини бартараф этиш миллий агентлиги томонидан қайта текширилиши ва тасдиқланиши керак.

Reutersʼнинг Фуқаро муҳофазаси расмийларига таяниб ёзишича, ҳозирда тегишли идоралар Минданао бўйлаб бино парчалари қулаши ва ер кўчкилари оқибатида 32 киши ҳалок бўлгани ҳамда 134 киши жароҳатлангани тўғрисидаги дастлабки хабарларни текширмоқда. Зилзила оқибатларини бартараф қилишга Филиппин ҳарбийлар ва табиий офат оқибатларини бартараф этиш гуруҳларини сафарбар қилинган.

Нашрнинг ёзишича, Табиий офатлар хавфини камайтириш ва бошқариш миллий кенгашининг расмий ҳисоботи одатда ҳодисадан бир кун ўтиб эълон қилинади. Улар полиция, маҳаллий расмийлар ва ҳуманитар ёрдам агентликлари каби турли манбалардан олинган барча рақамларни умумлаштириб, жадвал кўринишига келтиришади.

Бинолар қулаб тушди

Видео ва фотосуратларда биноларнинг қулаётгани, жумладан, «Jollibee» тезкор таомлар ресторани биносининг бутунлай вайронага айлангани акс этган.

Earthquake in General Santos City, The Philippines on June 8, 2026 pic.twitter.com/ye8LHYwVzB

— Noypi (@noypistuff) June 8, 2026

Ғарбий Давао вилоятидаги бошланғич мактаблардан бири ижтимоий тармоқларга жойлаштирилган видеода ўнлаб қўрқиб кетган ўқувчиларнинг силкинаётган ерда чўккалаб ўтирганини кўриш мумкин.

EARTHQUAKE SHAKES ELEMENTARY SCHOOL FLAG CEREMONY

WATCH: The magnitude 7.8 earthquake shocks students and teachers during their Monday morning flag ceremony at Mahayahay Elementary School in Barangay Kilalag, Malita, Davao Occidental.

As seen in the video, a small structure… pic.twitter.com/y5LzSJpRNS

— NewsWatch Plus PH (@newswatchplusph) June 8, 2026

Видеода, шунингдек, уларнинг ортидаги тунука томли бошпана қулаб тушгани ҳам акс этган, бироқ мактаб маъмурияти ўз хабарида ҳеч ким жароҳат олмаганини қайд этди.

Филиппин президенти Фердинанд Маркос кичик ўз баёнотида тегишли идоралар табиий офат оқибатларини бартараф этиш чораларини ўзаро мувофиқлаштираётганини билдирди. «Миллий ҳукумат ҳаракатга тушган ва биз Минданаони эътиборсиз қолдирмаймиз», дея ваъда берди у.

Шунингдек, Маркос зилзиладан зарар кўрган ҳудудларда дарсларни тўхтатишга буйруқ берди. Ушбу офат Филиппинда янги ўқув йилининг биринчи кунига тўғри келди.

Беқарор минтақа

Геологик жиҳатдан беқарор бўлган «Оловли ҳалқа»да жойлашган Филиппинда зилзилалар тез-тез содир бўлиб туради. Бу зилзилаларнинг аксарияти кучсиз ва нисбатан тинч ўтса-да, айримлари ҳалокатли экани исботланган. Хусусан, ўтган йилнинг сентябрь ойида Марказий Висаяс минтақасида содир бўлган 6,9 магнитудали зилзила 70 дан ортиқ кишининг ҳаётига зомин бўлган эди.

Душанба куни эрталаб юз берган зилзиладан кўп ўтмай, Японияга тегишли Огасавара оролларида эса 20 см баландликдаги тўлқин қайд этилди. Шунингдек, Индонезия, Палау ва Филиппин қирғоқларининг бир нечта нуқталарида ҳам тўлқинлар аниқланган.

Расмийларга кўра, ушбу тўлқинларнинг баландлиги бир неча сантиметрдан 1,4 метргача етган. Цунами хавфига доир огоҳлантиришларнинг айримлари бир неча соатдан кейин бекор қилинди.