Ил-20 эффекти. Россия Сурияни С-300 билан қуроллантиради

Россия Сурияга замонавий С-300 зенит ракета комплексини тақдим этади. Бу ҳақда РФ мудофаа вазири Сергей Шойгу 24 сентябрь, душанба куни хабар берди, деб ёзмоқда ТАСС.

«Сурия қуролли кучларига икки ҳафта ичида замонавий С-300 зенит ракета комплекси тақдим этилади. У 250 километрдан ортиқ масофада ҳаво ҳужуми воситаларини тутиб олиши ҳамда бир вақтнинг ўзида ҳаводаги бир нечта объектни аниқ нишонга олиши мумкин», - дея маълум қилди мудофаа маҳкамаси раҳбари.

Шойгунинг сўзларига кўра, С-300 ўзининг имкониятлари ва тезлиги билан Сурия ҳаво ҳужумидан мудофаа тизимининг жанговар салоҳиятини сезиларли даражада мустаҳкамлаши керак.

Июнь ойида Сурия президенти Башар Асад Россиядан С-300 зенит ракета комплекслари етказиб берилиши ҳақида хабар бермаслигини маълум қилганди. «Ушбу комплекслар тақдим этилиши ёки этилмаслиги ҳақида биз ҳеч кимга хабар бермаймиз. Бу қурол, у ҳақида қачон қўлланилса, шунда билиб олишади», - дея изоҳ берганди ўшанда у.

Эслатиб ўтамиз, аввалроқ Исроил Сурияда Россияга тегишли Ил-20 самолётининг ҳалокатига нима сабаб бўлганини маълум қилганди.